ކުރިއަށް އޮތް ލޯކަލް ކައުންސިލު އިންތިހާބުގައި އެކި މަގާމުތަކަށް ވާދަކުރުމަށް 1،300 އަށްވުރެ ގިނަ ކެންޑިޑޭޓުން ކުރިމަތިލުމަށް ހުށަހެޅި ފޯމުތައް އިލެކްޝަންސް ކޮމިޝަނަށް ބަލައިގަނެފައިވާކަމަށް އެ ކޮމިޝަނުން ބުނެފިއެވެ. 

އިލެކްޝަންސް ކޮމިޝަނުން ހާމަކޮށްފައިވާ ތަފާސްހިސާބުތަކަށް ބަލާއިރު އިއްޔެގެ ނިޔަލަށް 1،324 ކެންޑިޑޭޓެއްގެ ކެންޑިޑެސީ އެެ ކޮމިޝަނުން ބަލައިގަނެފައިވެއެވެ. އެއީ ލޯކަލް ކައުންސިލު އިންތިހާބުގައި ވާދަކުރާ 750 ކެންޑިޑޭޓުންނާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ވާދަކުރާ 474 މީހެއްގެ ކެންޑިޑޭޓުންނެވެ. 

މިހާތަނަށް ކެންޑިޑެސީ ބަލައިގަނެފައިވާ 1،324 މީހުންގެ ތެރެއިން 1،105 މީހުންނަކީ ސިޔާސީ ޕާޓީތަކުގެ ޓިކެޓުގައި ވާދަކުރާ ކެންޑިޑޭޓުން ކަމަށްވެސް އިލެކްޝަންސް ކޮމިޝަނުން ބުނެފައިވެއެވެ. 

އަދި މިހާތަނަށް ކެންޑިޑެސީ ފޯމު ހުށަހަޅާފައިވާ މީހުންގެ ތެރެއިން އެކި މައްސަލަތައް މެދުވެރިވެ 309 މީހެއްގެ ކެންޑިޑެސީ ގަބޫލުނުކުރުމަށް އިލެކްޝަންސް ކޮމިޝަނުން ނިންމާފައިވެއެވެ. 

އެ ކޮމިޝަނުން ބުނެފައިވާ ގޮތުގައި ކެންޑިޑެސީ ބަލައިނުގަތުމަށް ނިންމި މީހުންގެ ތެރެއިން 183 މީހަކު އެއީ ލޯކަލް ކައުންސިލު އިންތިހާބުގައި ވާދަކުރަން ހުށަހެޅި މީހުންނެވެ. އަދި 126 މީހުންނަކީ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ކުރިމަތިލުމަށް ހުށަހެޅި މީހުންނެވެ. 

އަންނަ އޭޕްރީލު މަހުގައި ބާއްވާ ލޯކަލް ކައުންސިލު އިންތިހާބުގައި ވާދަކުރުމަށް ވެރިކަންކުރާ ކޮންގުރެސް ޕާޓީގެ ފަރާތުން 1،300 އަށްވުރެ ގިނަ ކެންޑިޑޭޓުންވަނީ ނިންމާފައެވެ. އެއީ މިހާތަނަށް އެއް ޕާޓީއަކުން ލޯކަލް ކައުންސިލު އިންތިހާބަށް އެންމެ ގިނައިން ކެންޑިޑޭޓުން ނެރެފައިވާ އަދަދެވެ. 

އެ ޕާޓީގެ އިތުރުން އިދިކޮޅު އެމްޑީޕީންވެސްވަނީ އެ ޕާޓީގެ ފަރާތުން ލޯކަލް ކައުންސިލު އިންތިހާބުގައި ވާދަކުރާނެ ކެންޑިޑޭޓުން ކަނޑައަޅާފައެވެ.