ސަރުކާރުން އިއުލާނުކޮށްފައިވާ އާއިލީ ބޯހިޔާވަހިކަމުގެ ސިޔާސަތާމެދު އާއްމުންގެ މެދުގައި ހުރި ކަންބޮޑުވުންތަކާއި، އުފެދޭ ސުވާލުތަކަށް ޖަވާބުދެއްވަމުން އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ.އަބްދުﷲ މުއްތަލިބު އެ ސިޔާސަތުގެ ފަހަތުގައިވާ ފިކުރާއި ވިސްނުމާއި، އެ ސިޔާސަތުން ދިގުރާސްތާގައި ހާސިލުކުރަން ސަރުކާރުން ބޭނުންވާ އަމާޒުތައް ވިދާޅުވެދެއްވައިފިއެވެ. 

ލިންކެޑިންގައި ޝާއިއުކުރެއްވި ލިޔުއްވުމެއްގައި މިނިސްޓަރު ވިދާޅުވީ މިހާރު ދެމަފިރިންކުރެ އެކަކަށް އެއް ކޮޓަރި ނުވަތަ ދެ ކޮޓަރީގެ އެޕާޓުމެންޓެއް ލިބިފައިވާ މީހުންގެ ތެރެއިން އުމުރުން 18 އަހަރު ނުފުރޭ ދަރިން ތިބޭ މީހުންނަށް ސަރުކާރުން އިއުލާނުކުރި ގެދޮރުވެރިކަމުގެ ސްކީމުގެ ދަށުން ފުލެޓާއި ގޯއްޗަށް އެދި ހުށަހެޅޭނެ ކަމަށެވެ. 

ނަމަވެސް މާލޭ ސަރަހައްދުގައި ދެމަފިރިންކުރެ އެކެއްގެ މިލްކުގައި 400 އަކަފޫޓަށްވުރެ ބޮޑު ގޯއްޗެއް އޮވެއްޖެނަމަ ގޯއްޗަށް ކުރިމަތިނުލެވޭ ގޮތަށް އޮތުމާ ގުޅިގެން ބައެއް އާއްމުން ކަންބޮޑުވުން ފާޅުކުރަމުންދާކަން ފާހަގަކުރައްވަމުން، އާއިލީ ބޯހިޔާވަހިކަމުގެ ސިޔާސަތުގެ ދަށުން އެއްވެސް ގޮތަކަށް ބޯހިޔާވަހިކަމެއް ނުވަތަ އަމިއްލަ ގެދޮރު ނެތް މީހުންނަށް އިސްކަންދޭ ސަބަބު މިނިސްޓަރު ތަފުސީލުކޮށް ބަޔާންކޮށްދެއްވިއެވެ. 

މިނިސްޓަރު ވިދާޅުވި ގޮތުގައި އާއްމު ގެދޮރުވެރިކަމުގެ ސިޔާސަތުގެ މައިގަނޑު ބޭނުމަކީ ޝަރަފުވެރި ހަމަޖެހޭ ދިރިއުޅުމުގެ ބިންގަލެއް ނެތް އެއްވެސް އާއިލާއެއް ނެތްކަން ކަށަވަރުކުރުން ކަމަށެވެ. ގެދޮރުވެރިކަމަކީ އިތުރުކުރަން އޮތް ބޯނަހެއް ނޫންކަމަށާއި، އެއީ ތައުލީމާއި ސިއްހަތައި ވަޒީފާއާއި އިޖުތިމާއީ ހަމަޖެހުމަށް ވާސިލުކޮށްދޭ ދޮރާށީގެ ގޮތުގައި ސިފަކުރައްވަމުން ވަޒީރު ވިދާޅުވީ ގެދޮރެއް ގޯއްޗެއް ނެތި އާއިލާއެއް ދިރިއުޅޭނަމަ އެ އާއިލާއެއް އެ ދިރިއުޅެނީ ސާފު ނާޒުކުކަމުގެ ތެރޭގައި ކަމަަށެވެ. 

ކޮންމެވެސް ގޮތަކަށް ކޮންމެވެސް މިންވަރެއްގެ ބޯހިޔާވަހިކަމެއް ލިބިފައި އޮވެއްޖެނަމަ، އެ އާއިލާއެއްގެ ހާލަތުގައި ގޮންޖެހުންތައް ހުއްޓަސް، އެއްވެސް އަމިއްލަ ގެދޮރެއް ބޯހިޔާވަހިކަމެއް ނެތި ދިރިއުޅޭ އާއިލާތަކާ އެފަދަ އާއިލާތަކުގެ ހާލަތު ތަފާތުވާނެ ކަމށް ވަޒީރު ވިދާޅުވިއެވެ. 

އެހެންކަމުން އާއިލީ ބޯހިޔާވަހިކަމުގެ ސިޔާސަތުގެ މައިގަނޑު މަބްދައަކީ، އެއްވެސް ގޮތެއް ނެތް މީހުންނަށް ކޮންމެވެސް ގޮތެއް އޮތް މީހުންގެ މައްޗަށް އިސްކަންދިނުމުގެ އަދުލުވެރި އުސޫލުކަން ފާހަގަކުރައްވަމުން މުއްތަލިބު ވިދާޅުވީ އެއީ އަހުލާގީ ނިންމުމެއް ނުވަތަ ހައްގުކަން ބޮޑުވުމާމެދު ބުނާ ބަހެއް ނޫން ކަމަށެވެ. ވަޒީރު ވިދާޅުވި ގޮތުގައި އެއީ ގެދޮރުވެރިކަމުގެ ރައްކާތެރިކަމުން އެންމެ ބޮޑަށް މަހުރޫމުވެފައިވާ ފަރާތްތަކަށް ހޯދައިދެވޭ ހައްލެއް ކަމަށެވެ. 

ގެދޮރެއް ނެތް އާއިލާއަކީ ދުރު ރާސްތާ ރައްކާތެރިކަމެއް ނެތް، ދަތި ހާލަތުގައި ބަރޯސާވެވޭނެ އިތުރު މަގެއްވެސް ނެތް، ގެދޮރުގެ އަގު އުފުލުމާއި ގެދޮރުން ބޭރުވުމުން ރައްކާތެރިކޮށްދޭނެ ދަފަރާއެއްވެސް ނެތް އާއިލާއެއްކަން ވަޒީރު ފާހަގަކުރެއްވިއެވެ. 

ދެމަފިރިންކުރެ އެކެއްގެ މިލްކުގައި ބޯހިޔާވަހިކަމެއް ނުވަތަ ބމެއް އޮތްނަމަ އެ ބިން ނުވަތަ ގެދޮރުގެ ބޮޑުމިން ތަފާތުވިޔަސް، އެންމެ ފުރިހަމަނޫނަސް ކޮންމެވެސް މިންވަރެއްގެ ރައްކާތެރިކަމެއް އެ އާއިލާއަށް އޮންނާނެކަން ފާހަގަކުރައްވަަމުން ވަޒީރު ވިދާޅުވީ ވަސީލަތްތައް ތަދު ހާލަތުގައި އިސްކަންދިނުމަކީ ތަފާތުކުރުމެއް ނޫންކަމަށެވެ. އެއީ ސަރުކާރެއްގެ ޒިންމާ ކަމަށެވެ. 

ހިރާސްތަކައި ޒިންމާއާއި އާމްދަނީއާއި ދިރިއުޅޭ ޖާގަ ހިއްސާކުރަނީ އާއިލާތަކުންކަން ފާހަގަކުރައްވަމުން މުއްތަލިބު ވިދާޅުވީ އާއިލީ ބޯހިޔާވަހިކަން ސިޔާސަތަކީ ހުސްކަމެއްގެ ތެރޭގައި ތަންފީޒުކުރެވޭ ސިޔާސަތެއް ނޫން ކަމެވެ. ސަރުކަރުން އިޖުތިމާއީ ބޯހިޔާވަހިކަމުގެ ޔުނިޓުތަކާއިން ބިން އަދި އަތް ފޯރާފަށުގައި މިލްކުކުރެވޭ ގެދޮރުވެރިކަން ފޯރުކޮށްދޭއިރު، އަމިއްލަ ވިޔަފާރިތަކުންވެސް ބޯހިޔާވަހިކަން ފޯރުކޮށްދެމުންދާނެ ކަމަށެވެ. މި ހުރިހާ ސްކީމެއްގެ މަގުސަދަކީ ގެދޮރުވެރިކަމަށް އޮތް ޑިމާންޑާ ކައިރިކުރާ މިންވަރަށް ބޯހިޔާވަހިކަން ފޯރުކޮށްދިނުމެވެ. 

މިގޮތަށް ކުރެވޭ މަސައްކަތްތަކުން ގެދޮރުވެރިކަން ފޯރުކޮށްދެވޭ މިންވަރު އިތުރުކުރެވި ބޯހިޔާވަހިކަމަަށް އޮތް ޑިމާންޑު ކުޑަކުރެވި، ކޮންމެ އާއިލާއަކަށް އެެއް ގެދޮރު ނުވަތަ ބިން ކަށަވަރުކުރެވުމުން މިހާރު އޮތް ސިޔާސަތަށް ބަދަލުތައް ގެނެވި، ޝަރުތުތައް މިހާރަށްވުރެ ލުއިކުރެވި، އިތުރު ފުރުސަތުތައް ފަހިކުރެވިގެންދާނެ ކަމުގައި ވަޒީރު ވިދާޅުވިއެވެ. 

"އަދުލުވެރިކަން ނިޔާކުރަނީ އެއް އާއިލާއަކަށް ދެ ގެދޮރު ލިބޭއިރު އެންމެ ގެދޮރެއް ނެތް އެއްވެސް އާއިލާއެއް ނެތްކަން ކަށަވަރުކުރުން،" ވަޒީރު ލިޔުއްވިއެވެ. 

ވަޒީރު ބަޔާންކުރެއްވި ގޮތުގައި އާއިލީ ބޯހިޔާވަހިކަމުގެ ސިޔާސަތުގެ ކުންނުގައި އޮތް މައިގަނޑު އުސޫލަކީ ނުވަތަ މަބްދައަކީ، އާއްމު ގެދޮރުވެރިކަމުގެ އަސާސީ ފުރަތަމަ މަގުސަދަކީ ކޮންމެ އާއިލާއަކަށް ދިރިއުޅެވޭނެ ބޯހިޔާވަހިކަމެއް ފޯރުކޮށްދިނުން ކަމަށެވެ. އެ ބިންގާ އަޅައި ރަނގަޅަށް ޔަގީންކުރެވުމުން ދެން ފުރުސަތުތައް ފަހިކުރުމުގެ މަރުހަލާ ފެށިގެންދާނެ ކަމުގައި ވަޒީރު ވިދާޅުވިއެވެ.