ނ. ވެލިދޫ ބަނދަރު ތަރައްޤީކުރުމުގެ މަޝްރޫޢު ބާރު ސްޕީޑްގައި ކުރިއަށް ދާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ބުނެފިއެވެ.

އެކުންފުނިން ބުނީ މި މަޝްރޫޢުގެ ދަށުން، އެރަށު ބަނދަރުގެ ކެޕިން ބީމް އެޅުމުގެ މަސައްކަތާއި، ބަނދަރު ސަރަޙައްދުގައި ޕޭވްމަންޓް އެޅުމުގެ މަސައްކަތްތައް މިހާރު ކުރިއަށް ގެންދާކަމަށެވެ.

ވެލިދޫ ބަނދަރުގެ މަސައްކަތް އެމްޓީސީއާއި ހަވާލު ކުރީ 2022 ވަނަ އަހަރުގެ ޑިސެންބަރު 29 ވަނަ ދުވަހުއެވެ. އެހެންނަމަވެސް މިދިޔަ ސަރުކާރުގެ ވެރިކަން ނިމުނުއިރު ވެސް އެމަސައްކަތް ދިގުލައިގެން ގޮސް މަސައްކަތް އޮތީ ކުރިއަށް ނުގޮހެވެ. 

މި މަޝްރޫޢުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކުގެ ތެރޭގައި ބަނދަރު ފުންކުރުމާއި، ބޭރުތޮށިލުމާއި، ރިވެޓްމަންޓް ޖެހުމާއި، ކޮންކްރީޓް ޖެޓީއެއް ބިނާކުރުމާއި، އެއްގަމުތޮށިލުމާއި، ބަނދަރު ބައްތި ހަރުކުރުމުގެ އިތުރުން ޕޭވްމަންޓް ހެދުމުގެ މަސައްކަތް ހިމެނެއެވެ. 

މި ސަރުކާރުން އަންނަނީ ނިމި ދިޔަ ވެރިކަމުގައި، ނުކުރެވި ހުރި މިފަދަ މަޝްރޫޢުތައް ފައްޓަވައި ބާރު ސްޕީޑް ގައި ނިންމަމުންނެވެ.

ނ. ވެލިދޫ އަކީ ދެހާސް ހަތްސަތޭކައެއްހާ މީހުންގެ އާބާދީއެއް ދިރިއުޅެމުންދާ ރަށެކެވެ.

ވެލިދޫ ބަނދަރުގެ މަސައްކަތް ބާރު ސްޕީޑުގައި ކުރިއަށްދާއިރު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް މިހާރު އެރަށުގައި ވަނީ ސީޕްލޭންގެ ޚިދުމަތް ވެސް ފަށައިފައެވެ.