ރޯދަ ހަދިޔާގެ ގޮތުގައި ސަރުކާރުން ކޮންމެ އަހަރަކުވެސް ދޫކުރަމުންދާ މަސްދަޅު ރައްޔިތުންނާ ހަމައަށް ފޯރުކޮށްދިނުމުގެ މަސައްކަތް ފަށާފައިވާއިރު، ވީހާވެސް އަވަހަކަށް ރޯދަ ހަދިޔާއާ ހަވާލުވުމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ މިނިސްޓްރީގެ ސްޓޭޓް މިނިސްޓަރ މޫސާ ފަތުހީ އާދަމް އެދިވަޑައިގެންފިިއެވެ. 

މާލެ ސަރަހައްދުން ރޯދަ ހަދިޔާ ދޫކުރަން ފެށުމާއި ގުޅިގެން "އެމްއެމް" ޓީވީއަށް ދެއްވި ޚާއްސަ ބަސްދީގަތުމެއްގައި ސްޓޭޓް މިނިސްޓަރ ވިދާޅުވީ މިދިޔަ އަހަރުގެ ތަޖުރިބާއަށް ރިއާޔަތްކޮށް މިއަހަރުގެ އިންތިޒާމުތައް އިތުރަށް ވަރުގަދަކޮށްފައިވާކަމަށެވެ. 

މިގޮތުން ކިއުގައި ނުޖެހި މަސްދަޅު ލިބޭނެ އިންތިޒާމު ހަމަޖެއްސުމަށް މާލެ ސަރަހައްދުގެ 15 ތަނަކުން މަސްދަޅު ދޫކުރަމުންދާކަމަށް ވިދާޅުވިއެވެ. އެއީ މާލޭގެ 8 ތަނަކާއި، ހުޅުމާލެ ފޭސް 1 އަދި 2 ގެ 6 ތަނަކާއި، ވިލިމާލޭގެ 1 ތަނެވެ. އަދި މިއަހަރުވެސް ރޯދަ ހަދިޔާއާ ހަވާލުވުމަށް އެކަމަށް ޚާއްސަކޮށްފައިވާ ޕޯޓަލް މެދުވެރިކޮށް ޓޯކަން ނަގައި، ފަސޭހަ ގަޑިއެއްގައި ފަސޭހަ ސެންޓަރެއް ހަމަޖެއްސޭނެ ކަމަށް ފަތުހީ ވިދާޅުވިއެވެ.   

މިހާތަނަށް މާލެ ސަރަހައްދުގެ މަރުކަޒުތަކުން 4،100 އަށްވުރެ ގިނަ މަސްދަޅު ކޭސް ދޫކޮށްފައިވާއިރު، ރައްޔިތުންގެ ފަރާތުން މިކަމަށް ލިބެމުންދާ ތަރުހީބު މިނިސްޓަރ ފާހަގަކުރެއްވިއެވެ. އަދި އިންތިޒާމުތައް ހަމަޖެހިފައިވާގޮތް ރައްޔިތުން ފާހަގަކޮށް ހިތްހަމަޖެހުން ފާޅުކޮށްފައިވާކަމަށް ވިދާޅުވިއެވެ. ސްޓޭޓް މިނިސްޓަރ ވަނީ ފަހު ވަގުތައް މަޑުނުކޮށް ރޯދަ ހަދިޔާ ނެގުމަށް އިލްތިމާސްކުރައްވާފައެވެ. 

ސްޓޭޓް މިނިސްޓަރ ފަތުހީ އިތުރަށް ވިދާޅުވީ މާލެ ސަރަހައްދުގެ އިތުރުން އަތޮޅުތެރެއިން ރޯދަ ހަދިޔާ ދޫކުރުމަށް، އަތޮޅުތެރެއަށް މަސްދަޅު ފޮނުވުމުގެ އިންތިޒާމު މިހާރު ހަމަޖައްސަމުންދާކަމަށެވެ. އަތޮޅުތެރޭގައި މަސްދަޅު ބެހުން ކުރިއަށްދާނީ ކައުންސިލްތައް މެދުވެރިކޮށްކަމަށް ސްޓޭޓް މިނިސްޓަރ ފާހަގަކުރެއްވިއެވެ. 

އަމާޒަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ވައުދުފުޅާ އެއްގޮތަށް ވީހާވެސް ފަސޭހައިން ރައްޔިތުންނަށް ރޯދަ ހަދިޔާއާ ހަވާލުވެވޭނެ ގޮތް ހަމަޖައްސައިދިނުންކަމުގައި ސްޓޭޓް މިނިސްޓަރ ފާހަގަކުރެއްވިއެވެ.