ރިސޯޓް ހޮލިޑޭޒް އިން އިންތިޒާމުކޮށްގެން ރަޝީޔާގެ ވެރިރަށް މޮސްކޯގައި ބެއްވި މަންޓާ ފޯރަމް 2025 ގައި ވިޒިޓް މޯލްޑިވްސް ކޯޕަރޭޝަނުން ބައިވެރިވެއްޖެ އެވެ.

ރަޝިޔާގެ އިތުރުން ދުނިޔޭގެ އެކި ކަންކޮޅުތަކުން 110 ރިސޯޓް/ހޮޓާ، އަދި ޓްރެވަލް އޭޖަންޓުން ބައިވެރިވި މި ފޯރަމްގައި ވިޒިޓް މޯލްޑިވްސް ކޯޕަރޭޝަންގެ ސީއީއޯ އަދި މެނޭޖިންގ ޑިރެކްޓަރ އިބްރާހިމް ޝިޢުރީ ވަނީ ބައިވެރިވެވަޑައިގެންފަ އެވެ. މިއީ ރާއްޖެއަށް އެންމެ ގިނައިން ފަތުރުވެރިން އަންނަ އެއް މަންޒިލް ކަމަށްވާ ރަޝީޔާގެ މާކެޓްގައި ދިވެހި ރާއްޖެ ތަމްސީލްކުރުމަށް ވިޒިޓް މޯލްޑިވްސް ކޯޕަރޭޝަނުންދޭ އަހައްމިއްޔަތުގެ ރަމްޒެއް ކަމަށް އެ ކޯޕަރޭޝަނުން ވަނީ ބުނެފަ އެވެ.

މިއަހަރުގެ ފޯރަމްގައި، ރާއްޖޭގެ ލަގްޒަރީ ޓްރެވަލް ސެގްމަންޓުގެ އިތުރުން، ދެމެހެއްޓެނިވި ފަތުރުވެރިކަން ކުރިއެރުވުމަށް ކުރާ މަސައްކަތްތަކާއި ގުޅޭގޮތުން މަޝްވަރާކޮށްފައިވެ އެވެ.

އެއްދުވަހުގެ މުއްދަތަށް ކުރިއަށްދިޔަ މި ފޯރަމުގެ ސަބަބުން ސީއައިއެސް ޤައުމުތަކުގެ ފަތުރުވެރިކަމުގެ ސިނާޢަތުގައި މަސައްކަތްކުރާ ހިއްސާދާރުންނާ ވަކިވަކީން ބައްދަލުކުރެވި، ރާއްޖެ އިސްތިހާރުކުރުމަށް ކުރެވޭނެ މަސައްކަތްތަކާބެހޭގޮތުން މަޝްވަރާ ކޮށްފައިވެ އެވެ.