ENGLISH
30 އޯގަސްޓު 2025
ރައީސްގެ ވަޢުދުފުޅާ އެއްގޮތަށް ޙާފިޒުންގެ އެލަވަންސް ދެ ގުނަ ބޮޑުކޮށް ޖަމާކޮށްދީފި
03 އޯގަސްޓު 2025
|
ޙާފިޒަކަށް ރައީސް ތާޖު ހަވާލުކޮށް ދެއްވަނީ
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދުފުޅާ އެއްގޮތަށް ޙާފިޒުންގެ އެލަވަންސް ދެ ގުނަ ބޮޑުކޮށް މިދިޔަ މަހުގެ އެލަވަންސް މިއަދު ޖަމާކޮށްފި އެވެ.
ރިޔާސީ އިންތިޚާބުގައި ވަޢުދުވެވަޑައިގެންނެވި ފަދައިން ޙާފިޒުންނަށް ދޭ އެލަވަންސް 1 ޖުލައި 2025 އިން ފެށިގެން ދެ ގުނަ އަށް ބޮޑު ކުރުމަށް ވަޒީރުންގެ މަޖިލީހުގެ ޖަލްސާގައި ނިންމާފައިވާ އެކަން ރައީސް އިއުލާނު ކުރެއްވީ ޖޫން މަހުގެ 24 ވަނަ ދުވަހު އެވެ.
އެ ވަޢުދުފުޅާއި އެއްގޮތަށް ޙާފިޒުންގެ އިނާޔަތް 2،000 ރުފިޔާ އިން 4،000 ރުފިޔާއަށް ބޮޑުކޮށް މިއަދު ވަނީ މިދިޔަ ޖުލައި މަހުގެ އެލަވަންސް ޖަމާކޮށްފަ އެވެ.
އެލަވަންސް ބޮޑުކުރުމުގެ އިތުރުން ޙާފިޒުން ތަމްރީނު ކުރުމާއި ޙާފިޒުންނަށް ދޭ އަހައްމިއްޔަތުކަން އިތުރު ކުރުމަކީ ކީރިތި ޤުރުއާނަށް އޮންނަ ލޯބި އިތުރު ކުރުމުގައި ނުހަނު މުހިއްމު ކަމެއް ކަން ފާހަގަކޮށް އެކަން ވެސް ސަރުކާރުން ދަނީ ކުރަމުންނެވެ.
ޙާފިޒުން އުފެއްދުމަށް ސަރުކާރުން ދަނީ ވަރަށް ބޮޑު އިސްކަމެއް ދެއްވައިގެން މަސައްކަތް ކުރައްވަމުންނެވެ. ނަތީޖާއެއްގެ ގޮތުން މި އަހަރު 24 ފަރާތަކުން ވަނީ ކީރިތި ޤުރުއާން ހިތުންދަސްކޮށް ޙާފިޒު ކަމުގެ ސަނަދު ހާސިލު ކުރައްވާފަ އެވެ. މިއީ އަހަރެއް ތެރޭ އެންމެ ގިނަ ބަޔަކު ޙާފިޒު ކަމުގެ ސަނަދު ހާސިލުކުރި އަހަރެވެ.
މީގެ އިތުރުން ޙާފިޒުން ދަސްވެނިވުމަށް ޚާއްސަ ރަސްމިއްޔާތެއް މި އަހަރުން ފެށިގެން ބާއްވަން ވަނީ ނިންމާފަ އެވެ. މި އަހަރުގެ ރަސްމިއްޔާތު ބޭއްވީ ރަމަޟާން މަހުގެ 27 ވިލޭރެ އެވެ.
އަދި ޙާފިޒުން ދަސްވެނިވާއިރު ލާނެ ޚާއްސަ ތާކިހަލާއި ގައުނެއް ވަނީ ފަރުމާކޮށްފަ އެވެ.
ސަރުކާރުގެ އަމާޒަކީ އަހަރަކު 100 ޙާފިޒުން އުފެއްދޭ މިންވަރަށް އެ މަސައްކަތް ފުޅާ ކުރެއްވުމެވެ. އަދި ފަސް އަހަރު ތެރޭ ހާފިޒުކަމުގެ ސަނަދު ހާސިލްކުރާ ކުދީންގެ އަދަދު 1000 އަށް އެރުވުމަކީ ވެސް އިސްލާމިކް މިނިސްޓްރީގެ އަމާޒެކެވެ.