ސޫރިޔާގެ ދެކުނުގައި އޮތް އަލް-ސުވަޔިދާގައި ސުލްޙަ ޤާއިމުކުރެވިފައިވާ ކަމަށް ސޫރިޔާގެ ރައީސް އިޢުލާނުކުރެއްވި ފަހުން ވެސް ހަމަނުޖެހުންތައް ހިނގަމުންދާކަމަށް ރިޕޯޓުތައް ބުނެފިއެވެ.

އެ ސަރަޙައްދުގައި ދިރިއުޅޭ ދުރޫޒީ ދީނުގެ މީހުންނާއި ބަދަވީންނާ ދެމެދު ބޮޑެތި ހަމަނުޖެހުންތައް ހިނގަމުންދާތާ އެތައް ދުވަހެއް ވެއްޖެއެވެ.

ހަމަނުޖެހުންތައް ކޮންޓްރޯލްކުރަން ބަރުހަތިޔާރާ އެކު ސޫރިޔާގެ އަސްކަރިއްޔާގެ ސިފައިން ސުވަޔިދާއަށް ވަނީ ފޮނުވައިފައެވެ.

އެ ހަމަނުޖެހުންތަކުގައި މަރުވެފައިވާ މީހުންގެ އަަދަދު 940 އަށް އުފުލިފައިވާ ކަމަށްވެއެވެ. އޭގެ ތެރޭގައި ބަދަވީ ދަރިކޮޅުގެ ގިނަ އަދަދެއްގެ މުސްލިމުން ހިމެނޭ ކަމުގައި ރިޕޯޓުތައް ބުނެއެވެ. އަދި އެ ހަމަނުޖެހުންތައް އިތުރަށް ގޯސްވީ، ސޫރިޔާގެ ސިފައިން އެ ސަރަޙައްދަށް ދިޔުމުން ކަމުގެ ތުހުމަތުތައް ވެސް ވަނީ އަމާޒުވެފައެވެ.

ދުރޫޒީންގެ ދިފާޢުގައި ކަމަށް ބުނެ ސުވަޔިދާގައި ތިިބި ސޫރިޔާގެ ސިފައިންނަށް އަމާޒުކޮށް އިޒްރޭލުން ވަނީ ޙަމަލާ ދޭން ފަށާފައެވެ. އެޗްޓީއެސްގެ ސަރުކާރާއި އިޒްރޭލާ ދެމެދު ޙަމަލާ ބަދަލު ކުރުން މެދުކަނޑައިލުމުގެ އެއްބަސްވުމެއް އެކުލަވައިލާފައިވާކަން ސޫރިޔާގެ ރައީސް އަޙްމަދު އަލް-ޝަރާޢު އިއްޔެ ވަނީ އިޢުލާނުކުރައްވައިފައެވެ.

އެއާ އެކު، އެ ސަރަޙައްދުގައި ގިނަ އަދަދެއްގެ ޗެކްޕޮއިންޓުތައް ޤާއިމުކޮށް، ސޫރިޔާގެ ސިފައިން ދަނީ ފޯރިމަރަމުންނެވެ. ނަމަވެސް، ސުވަޔިދާގައި ޙަމަލާތައް ބަދަލުކުރާ އަޑުތައް އިއްޔެ ވެސް އިވެމުންދިޔަ ކަމަށާއި، ފިހާރަތައް ލޫޓުވައި، ހުޅު ޖެހުމުގެ ހާދިސާތައް ހިނގިކަމަށް ބައެއް މީޑިއާ ރިޕޯޓުތައް ބުނެއެވެ.

ދުރޫޒީންނަކީ ސުވަޔިދާގެ އިތުރުން އިޒްރޭލުން ވެރިވެގެންފައިވާ ސޫރިޔާގެ އަލް-ޖޫލާންގެ ބިންތަކާއި، ލުބްނާނުގެ ބައެއް ސަރަޙައްދުތަކުގައި ދިރިއުޅޭ ބަޔެކެވެ.