ޣައްޒާގައި ހައިހޫނުކަމުގެ ސަބަބުން 900 އަށްވުރެ ގިނަ މީހުން ޝަހީދުވެފައިވާކަމަށާއި، ޝަހީދުންގެ ތެރޭގައި 71 ކުޑަކުދިން ހިމެނޭކަމަށް ޣައްޒާގެ ޞިއްޙަތާ ބެހޭ ވުޒާރާއިން ބުނެފައިވެއެވެ. 

އެ ވުޒާރާއިން ބުނެފައިވާ ގޮތުގައި ކާބޯތަަކެތީގެ ތަދުކަން ބޮޑުވެފައިވަނިކޮށް އިންސާނީ އެހީތެރިކަން ފޯރުކޮށްދޭ ތަންތަނަށް ކޮއްތު ބަލައިގޮސް ތިއްބައި ސިހުޔޫނީ ސިފައިން ދިން ހަމަލާތަކުގައި 6،000 އެއްހައި މީހުން ޝަަހީދުކޮށްލާފއިވެއެވެ. 

މިފަދަ އެންމެ ފަހުގެ ގަތުލުއާއްމަކީ ޣައްޒާގެ އުތުރު ހުޅަނގުގައި އޮންނަ އައްސޫދާނިއްޔާ ނަމަކަށް ކިޔުނު ސަރަހައްދުގައި ހުރި އެހީ ބަހާ ތަނެއް ކައިރީ އެހީ ހޯދަން އެއްވެ ތިބި މީހުންގެ ތެރެއަށް ސިހުޔޫނީ ސިފައިން ދިން ހަމަަލާއެއްގައި 63 މީހަކު ޝަހީދުކޮށްލި އަނިޔާވެރި ގަތުލުއާއްމެވެ. 

ޣައްޒާގެ ސިއްހަތާ ބެހޭ ވުޒާރާއިން ބުނީ އިސްރާއީލުން ޣައްޒާގައި ހައިހޫނުކަން ޖަމާއީ ގޮތެއްގައި އަދަބު ދިނުމަށް ބޭނުންކުރާ ހަތިޔާރެއްގެ ގޮތުގައި ބޭނުންހިފަމުން އަންނަ ކަމަށެވެ. އަދ ދެ މިލިއަން މީހުންނަށްވުރެ ގިނަ މީހުން އިންސާނީ އެހީ ނުލިބި ހައިހޫނުކަމަށް ހުށަހެޅިފައިވާކަން އެ ވުޒާރާއިން ފާހަގަކުރިއެވެ. 

ކާބޯތަކެތި ޣައްޒާއަށް ވަނަނުދިނުމުގެ އިތުރަށް ބޭހާއި ބޭސްފަރުވާއަށް ބޭނުންވާ ތަކެތި ޣައްޒާއަށް ވެއްދުން މަނާކޮށްފައި އޮތުމުގެ ސަބަބުން އެ ސިޓީގެ ސިއްހީ ނިޒާމު އެކީ އިންދިރާސްވެފައިވާކަން ފާހަގަކޮށް ސިއްހީ ބޮޑު ކާރިސާއެއް ކުރިމަތިވެފައިވާކަމަށް އެ ވުޒާރާއިން ބުންޏެވެ. 

އެ ވުޒާރާއިން ކަމާ ގުޅުންހުރި މުއައްސަސާތަކާއި ބައިންލައަގުވާމީ މުޖުތަމައަށް ގޮވައިލީ ސިހުޔޫނީ ދައުލަތަށް ފިއްތުން ކުރިމަތިކޮށް، ޣައްޒާއަށް ބޭނުންވާަ ކާބޯތަކެއްޗާއި ބޭހާއި ފަރުވާދިނުމަށް ބޭނުންވާ ސާމާނު އެ ސަރަހައްދަށް އެތެރެކުރުމުގެ ހުއްދަ ދިނުމަށް ބާރުއެޅުމަށެވެ. 

ޣައްޒާއަށް ކުރިމަތިކޮށްފައި އޮތް ހިސާރުގެ ސަބަބުން އެ ސަރަހައްދަށް ބޭނުންވާ އަސާސީ ކާބޯތަކެތި އެތެރެނުކުރެވި ކުޑަކުދިން އަނަރޫފަވެ މަރުވަމުންދާކަން އެ ސަރަހައްދުގެ އިދާރާތަކުން އަންނަނީ ދުނިޔޭގެ ސަމާލުކަމަށް ގެންނަމުންނެވެ. 

ޣައްޒާގެ ޞިއްޙީ ވުޒާރާއިން ބުނި ގޮތުގައި ބޭސްފަރުވާ ފޯރުކޮށްދޭ މަރުކަޒުތަކާއި ހޮސްޕިޓާތަކުގައި ތިބި ބަލިމީހުން ކާބޯތަކެތި ނުލިބި ހައިހޫނުކަމުގައި ތިބޭތާ 24 ގަޑިއިރަށްވުރެ ގިނައިރުވެފައި އެބަހުއްޓެވެ. އަދި އެތަންތަނުގައި މަސައްކަތްކުރާ މުވައްޒަފުންވެސް ހައިހޫނުކަމުގައި މަސައްކަތްކުރަންޖެހޭތީ އެކަށީގެންވާ ގޮތަށް ހިދުމަތް ފޯރުކޮށްދިނުމަށް ހުރަސްއެޅިފައިވާކަން އެ ވުޒާރާއިން ފާހަގަކުރެއެވެ. 

އިސްރާއީލުން އަންނަނީ ބައިނަލްއަގުވާމީ ގާނޫނުތަކާ މުއާހަދާތަކާ ކަނޑައެޅިގެން ހިލާފަށް އިންސާނީ އެހީތެރިކަން ހޯދުމަށް ކިއުގައި ޖެހިގެން ތިބޭ މީހުންނަށް އަމާޒުކޮށް ހަމަލާތައް ދެމުންނެވެ. މިފަދަ ހަމަލާތަކުގައި މަރުވާ މީހުންގެ އަދަދު ދުވަހަކަށްވުރެ ދުވަހެއް އިތުރުވަމުންދާކަން އެހީ ފޯރުކޮށްދިނުމުގައި ހަރަކާތްތެރިވާ ޖަމްއިއްޔާ ޖަމާއަތްތަކުންވެސް ދަނީ ފާހަގަކުރަމުންނެވެ.