ENGLISH
01 ސެޕްޓެމްބަރު 2025
އީރާނާއި އިޒްރޭލުގެ ޙަމަލާތައް ބަދަލުކުރުން ކުރިއަށް، މުޅި ދުނިޔެ ހާސްކަމުގައި!
16 ޖޫން 2025
|
އިރާނުން ފޮނުވި މިސައިލް އިޒްރޭލުގެ ތެލް އަވީވުގެ ސަރަހައްދެއްގައި ގޮވަނީ. --ފޮޓޯ: އީޕީއޭ
އީރާނާއި އިޒްރޭލުން ބަދަލުކުރަމުންދާ ވަރުގަދަ ޙަމަލާތައް ހަތަރު ވަނަ ދުވަހަށް ދިގުދެމިގެންގޮސް، މި ހަމަނުޖެހުންތައް މުޅި މެދުއިރުމައްޗަށް ފެތުރި، ސަރަޙައްދީ ބޮޑު ހަނގުރާމައަކަށް ބަދަލުވެދާނެކަމުގެ ބިރު ބޮޑުވެއްޖެއެވެ.
އީރާނަށް އިޒްރޭލުން މިދިޔަ ހުކުރު ދުވަހު ދޭން ފެށި ޙަމަލާތަކުގައި އީރާނުގެ އަސްކަރިއްޔާގެ ބައެއް ވެރިން ޝަހީދުކޮށްލާފައިވެއެވެ. އަދި އެ ގައުމުގެ ނިއުކްލިއާ ސަައެންސްވެރިންތަކެއް ވެސް ޝަހީދުކޮށްލިއެވެ. އޭގެ ރައްދުގައި އީރާނުން ވެސް މިސައިލާއި ޑްރޯން ބޭނުންކޮށްގެން، އިޒްރޭލުގެ އެކި ސަރަޙައްދުތަކަށް ވަނީ ޙަމަލާދީ، ބޮޑެތި ގެއްލުންތައް ދީފައެވެ.
މިދިޔަ ހުކުރު ދުވަހުން ފެށިގެން ދެ ފަރާތުން ޙަމަލާތައް ބަދަލުކުރަމުންދާއިރު، އާންމުން ދިރިއުޅޭ ސަރަޙައްދުތަކަށް އަމާޒުކޮށް ޙަމަލާތައް ދެމުންދާ ކަމަށް ދެ ފަރާތުން ވެސް ވަނީ ތުހުމަތުކޮށްފައެވެ.
ފާއިތުވި ހަތަރު ދުވަހުގެ ތެރޭގައި އިޒްރޭލުން ދިން ޙަމަލާތަކުގައި، މިހާތަނަށް އީރާނުގެ 224 މީހަކު ވަނީ ޝަހީދުކޮށްލައިފައެވެ. އޭގެތެރޭގައި އަންހެނުންނާއި ކުޑަކުދިން ވެސް ހިމެނެއެވެ. އޭގެއިތުރުން، އެ ޙަމަލާތަކުގައި ޒަޚަމްވި މީހުންގެ އަދަދު ވަނީ 1،200 އަށް އަރައިފައެވެ. އިޒްރޭލުގެ ރަހުމްކުޑަ ޢުދުވާނުތަކުގައި ގެއްލުން ލިބުނު މީހުންގެ 90 އިންސައްތަކީ އާންމުން ކަމަށް އީރާނުން ވަނީ ބުނެފައެވެ.
އީރާނުން ދިން ޙަމަލާތަކުގައި، މިހާތަނަށް 13 މީހަކު މަރުވެފައިވާކަމަށް އިޒްރޭލުން ބުނެފައިވެއެވެ.
އިޒްރޭލުން އިސްވެ ދިން ޙަމަލާތައް ދުނިޔޭގެ ގިނަ ޤައުމުތަކުން ވަނީ ކުށްވެރިކޮށްފައެވެ. އަދި ޙަމަލާތައް ހުއްޓާލައި، މަޝްވަރާގެ އުޞޫލު އިސްކުރަން ވެސް އެ ޤައުމުތަކުން ދަނީ ގޮވައިލަމުންނެވެ.
އީރާނުން ތަކުރާރުކޮށް ބުނަމުންދަނީ، އިޒްރޭލާ އެކު ހިނގަމުންދާ ކުރިމަތިލުންތައް ސަރަޙައްދީ ބޮޑު ހަމަނުޖެހުމަކަށް ބަދަލުވާން ބޭނުންނުވާ ކަމަށެވެ. ނަމަވެސް، އަމިއްލައަށް ދިފާޢުވުމުގައި އީރާނުން ފަހަތަށް ނުޖެހޭނެކަމަށް، އީރާނުގެ ޚާރިޖީ ވަޒީރު، އައްބާސް އާރާޤްޗީ ވަނީ ވިދާޅުވެފައެވެ.
އާރާޤްޗީ އިއްޔެ ވިދާޅުވި ގޮތުގައި، އިޒްރޭލުން ދިން ޙަމަލާތަކުގައި ޔަހޫދީންގެ ދައުލަތުގެ އެންމެ ބޮޑަށް ވާގިވެރިވާ އެމެރިކާ ބައިވެރިވެފައިވާކަމުގެ ހެކި ވަނީ ލިބިފައެވެ.
ނަމަވެސް، އިޒްރޭލުން އީރާނަށް ޙަމަލާދޭން އުޅޭކަމުގެ މަޢުލޫމާތެއް ޙިއްސާކޮށްފައިނުވާކަމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ ވިދާޅުވެފައެވެ.