އީރާނުގެ ނިއުކްލިޔަރ ޕްރޮގްރާމާ ގުޅޭގޮތުން އެމެރިކާއާ އެކު ކުރަމުންދާ މަޝްވަރާތައް ކޮޅެއްގައި ނުޖެހި، ސަރަޙައްދީ ކުރިމަތިލުމަކަށް ދާންޖެހިއްޖެނަމަ، މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް ޙަމަލާދޭނެކަމުގެ އިންޒާރު އީރާނުން ދީފިއެވެ.

އީރާނުގެ ނިއުކްލިޔަރ ޕްރޮގްރާމާ ގުޅޭގޮތުން، މިދިޔަ އޭޕްރީލް މަހުން ފެށިގެން މިހާތަނަށް ފަސް ފަހަރެއްގެ މަތިން، އެމެރިކާ އާއި އީރާނުގެ އޮފިޝަލުން ވަނީ ބައްދަލުކޮށް، މަޝްވަރާތައް ކުރިއަށް ގެންގޮސްފައެވެ.

މި މަޝްވަރާތަކަށް އޮތް އެންމެ ބޮޑު ހުރަހަކީ، ޔުރޭނިއަމް މުއްސަނދިކުރުން އީރާނުން ހުއްޓައިލަން އެމެރިކާއިން ކުރާ ޝަރުތެވެ. އެކަމަކު ޔުރޭނިއަމް މުއްސަނދިކުރަން އީރާނަށް ވެސް ލިބޭ ޙައްޤު ދޫކޮށްލަން، އީރާނުގެ ވެރިން ވަނީ ތަކުރާރުކޮށް ދެކޮޅު ހަދައިފައެވެ.

އެއާ އެކު، މި މަޝްވަރާތަކުން އެއްބަސްވުމަކާ ހަމައަށް ދެވުން ނާދިރުކަމަށް، އެމެރިކާގެ ރައީސް ޑޮނަލްޑް ޓްރަމްޕް ވެސް ދާދިފަހުން ވަނީ ވިދާޅުވެފައެވެ.

އެއްބަސްވުމަކަށް ނާދެވިއްޖެނަމަ، އީރާނަށް ޙަމަލާދޭނެކަމަށް ޓްރަމްޕް މީގެކުރިން ވަނީ އިންޒާރު ދެއްވައިފައެވެ.

އީރާނުގެ ދިފާއީ ވަޒީރު، ޢަޒީޒް ނާސިރުޒާދޭ ބުދަ ދުވަހު ވިދާޅުވީ، އެމެރިކާއިން އިސްވެ އީރާނަށް ޙަމަލާދީފިނަމަ އެ ސަރަޙައްދުގައި ހުރި އެމެރިކާގެ އަސްކަރީ މަރުކަޒުތަކަށް އީރާނުގެ ޙަމަލާތައް އަމާޒުކުރާނެ ކަމަށެވެ.

އީރާނާއި އެމެރިކާއާ ދެމެދު މަސްރަޙް އިތުރަށް ހޫނުވެފައިވާ މި ދަނޑިވަޅުގައި، އިރާޤުގައި ހުންނަ އެމެރިކާ އެމްބަސީގައި ތިބި ގިނަ ސްޓާފުން އަނބުރާ ގެންނަން ވަނީ ނިންމައިފައެވެ. މިއީ އީރާނާ އާއެކު ސަރަޙައްދީ ހަމަނުޖެހުމަކަށް ތައްޔާރުވުމުގެ ގޮތުން ކުރި ކަމެއްގެ ގޮތުގައި މަސްރަޙް ދިރާސާކުރާ ފަރާތްތަކުން ލަފާކުރެއެވެ.

ޓްރަމްޕްގެ ފުރަތަމަ ވެރިކަމުގައި ވަނީ 2015 ވަނަ އަހަރު އީރާނާއި ދުނިޔޭގެ ބޮޑެތި ބާރުތަކާ ދެމެދު ވެފައިވާ ނިއުކްލިއަރ އެއްބަސްވުމުން އެމެރިކާ ވަކިކޮށްފައެވެ. އެއަށް ފަހު އީރާނާ ދެކޮޅަށް ދަތިކުރުމުގެ ފިޔަވަޅުތަކެއް އަޅައިފައެވެ. އެމެރިކާއިން އެ ގޮތަށް ޢަމަލު ކުރުމުން އީރާނުން ވަނީ ނިއުކްލިއަރ އެއްބަސްވުމާ ޚިލާފަށް ޢަމަލު ކުރަން ފަށައި، ނިއުކްލިއަރ ބާރަކަށް ވުމުގެ މަސައްކަތް އަވަސްކޮށްފައެވެ.

އެއްބަސްވުމަކަށް ނާދެވުނަސް، އީރާނުން ނިއުކްލިޔަރ ހަތިޔާރެއް އުފެއްދުމަށް އެއްވެސް ހާލެއްގައި ފުރުޞަތު ނުދޭނެކަމަށް ޓްރަމްޕް ވަނީ ތަކުރާރުކޮށް ވިދާޅުވެފައެވެ.