ރ. އިންނަމާދޫގައި ގާއިމުކުރާ ހެލްްތް ސެންޓަރުގެ މަސައްކަތް ފެށިގެން ބާރު މިނުގައި ކުރިއަށްދާ ކަމަށް މޯލްޑިވްސް ޓްރާންސްޕޮތް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނެފިއެވެ.

އެމްޓީސީސީ އިން ބުނީ، މި މަޝްރޫއުގެ ދަށުން މިހާރު ކުރިއަށްދަނީ ޕްލަންބިންގެ މަސައްކަތާއި ސްލެބްގެ މަސައްކަތްތައް ކަމަށެވެ.

މި މަޝްރޫއަކީ ސިއްހަތާ ބެހޭ ވުޒާރާއިން އެމްޓީސީސީއާ ހަވާލުކޮށްގެން ކުރިއަށްގެންދާ މަޝްރޫއެކެވެ.

އެގޮތުން މި މަޝްރޫއުގެ ކޮންޓްރެކްޓުގައި ސިއްހީ ވުޒާރާގެ ފަރާތުން ސޮއިކުރެއްވީ، އެ ވުޒާރާގެ ސްޓޭޓް ފޯ ހެލްތް، އަހުމަދު ގާސިމްއެވެ. އަދި އެމްޓީސީސީގެ ފަރާތުން ސޮއި ކުރެއްވީ އެ ކުންފުނީގެ މެނޭޖިންގ ޑިރެކްޓަރު، އަހުމަދު ސައުދީއެވެ.

މިއީ 10.06 މިލިއަން ރުފިޔާގެ މަޝްރޫއެކެވެ. މި މަޝްރޫއުގެ ދަށުން 5 އެނދުގެ ޖާގައާއެކު ބޭސްފިހާރައެއް ހެދުމަށް ވެސް ވަނީ ހަމަޖެހިފައެވެ.