ފަހި ދިރިއުޅުން ކޯޕަރޭޝަން (އެފްޑީސީ)ގެ ފްލެޓްތައް ކުއްޔަށް ދޭނަމަ ފްލެޓްތައް އަތުލައި ބައިލައްކަ ރުފިޔާއާއި ހަމައަށް ފްލެޓުތަކުގެ ވެރިން ޖޫރިމަނާ ކުރާނެ ކަމަށް އެ ކޯޕަރޭޝަނުން ބުނެފި އެވެ. 

އިޖުތިމާއީ ބޯހިޔަވަހިކަމުގެ ސިޔާސަތުގެ ދަށުން އަތް ފޯރާ ފަށަށް ތިކުރެވިފައިވާ ހެޔޮ އަގުގައި ދޫކުރާ މި 4000 ފްލެޓްތަކުގައި ތިން ކޮޓަރިއާއި ދެ ކޮޓަރީގެ ފްލެޓްތައް ހުރެއެވެ. ސަރުކާރުގެ ބޯހިޔާވަހިކަމުގެ ސިޔާސަތުތަކުގެ ތެރެއިން ދޫކުރާ އެއްވެސް ބޯހިޔާވަހިކަމެއް ކުއްޔަށް ދީގެން އެއިން މަންފާއެއް ހާސިލުކުރުމަކީ އެއްބަސްވުމާއި ވެސް ހިލާފު ކަމެކެވެ.

ނަމަވެސް މި ފްލެޓުތައް ކުއްޔަށް ދިނުމުގެ މައްސަލަތަކެއް ކުރިން ވެސް ފެންމަތިވެފައިވާއިރު މިފަދަ މައްސަލައެއް މިހާރުވެސް ސޯޝަލް މީޑިއާގައި ވަނީ އާއްމުވެފަ އެވެ. އެގޮތުން އެފްޑީސީން ހުޅުމާލެ ދެވަނަ ފިޔަވަހިން ދޫކޮށްފައިވާ ތިން ކޮޓަރީގެ އެޕާޓްމެންޓެއް 23،000 ރުފިޔާއަށް ކުއްޔަަށް ދިނުމަށް މީހަކު ވަނީ ސޯޝަލް މީޑިއާގައި ޕޯސްޓު ޖަހާފަ އެވެ. ނަމަވެސް ތިން ކޮޓަރީގެ މި ފްލެޓަށް ސަރުކާރުން ކަނޑައަޅާފައިވަނީ 11،500 ރުފިޔާ އެވެ. އެހެންކަމުން މިއީ ސަރުކާރުން މި ތަންތަން ދޫކޮށްފައިވާ އަގަށް ވުރެ ދެގުނަ ބޮޑު އަގެކެވެ.

މައްސަލަ އެފްޑީސީގެ ސަމާލުކަމަށް ގެނެސްފައިވާއިރު އެ ކޯޕަރޭޝަންގެ މެނޭޖިން ޑިރެކްޓަރ ހަމްދާން ޝަކީލް ކުރެއްވި ޕޯސްޓެއްގައި އެފްޑީސީ ފްލެޓްތަކަކީ ތިން ވަނަ ފަރާތަކަށް ކުއްޔަން ދެވޭނެ ތަންތަން ނޫންކަން ތަކުރާރުކޮށް ވިދާޅުވެފައި ވެއެވެ. އަދި މިފަދަ އަމަލުތައް ކުރާ ފަރާތްތައް 50،000 ރުފިޔާއާ ހަމައަށް ޖޫރިމަނާކޮށް ފްލެޓުގެ އެއްބަސްވުން އުވާލެވޭނެ ކަމަށް ހަމްދާން ވިދާޅުވި އެވެ. 

ހަމްދާން ވިދާޅުވީ ސަރުކާރުން އިޖްތިމާއީ ބޯހިޔާވަހިކަމަށް ދޫކޮށްފައިވާ ފްލެޓްތައް ކުއްޔަށް ދިނުމަކީ މި ހައްގު ކަށަވަރުކޮށްދިނުމަށް ސަރުކާރުން ކުރަމުންދާ މަސައްކަތްތަކަށް ހުރަސްއެޅޭނެ ކަމެއް ކަމަށެވެ. މިއީ ގޯސް އަމަލެއްކަން ފާހަގަކޮށް ހަމްދާން ވަނީ ފްލެޓްތައް ފައިދާ ހޯދާ ވިޔަފާރިއަކަށް ހެދުމަކީ ކޮންމެ ދިވެއްސެއްގެ ހައްގަށް އަރައިގަތުން ކަމަށް ވިދާޅުވެފަ އެވެ.