ހައްޖު ކޯޕަރޭޝަނުގެ ފަރާތުން މައްކާގައި ގާއިމުކޮށްފައިވާ ހައްޖާއި އުމްރާވެރިންނަށް ހާއްސަ މެޑިކަލް ކްލިނިކުގެ ހިދުމަތް ދޭން ފަށައިފި އެވެ. 

މިއީ ހައްޖާއި އުމްރާގެ އަޅުކަމަށް މައްކާއަށްދާ ދިވެހިންނަށް ސިއްހީ ގޮތުން ދިމާވާ އެކި ކަހަލަ ގޮންޖެހުންތަކަށް ހައްލެއް ހޯދައިދީ، ލުއިފަސޭހަ އިންތިޒާމެއް ހަމަޖައްސައިދިނުމުގެ މަގުސަދުގައި ސަރުކާރުންނާއި ހައްޖު ކޯޕަރޭޝަނުން ހިންގާ ކްލިނިކެކެވެ. މިހާރު މި ކުލިނިކް ހިންގާތާ ވަނީ ދެ އަހަރު ވެފަ އެވެ. 

މީގެ ކުރިން މި ކްލިނިކްގެ ހިދުމަތްތައް ހާއްސަވެފައި އޮންނަނީ ހަމައެކަނި ހައްޖު ކޯޕަރޭޝަންގެ ހަވާލުގައި ދާ ހައްޖާޖީންނަށާއި އުމްރާވެރިން ނަށެވެ. ނަމަވެސް އެ ކޯޕަރޭޝަނުން އެކުލަވާލި އައު އުސޫލުގެ ދަށުން އަމިއްލަ އެކި ގްރޫޕްތަކުގައި ހައްޖާއި އުމްރާއަށްދާ ދިވެހިންނާއި، އެ ދުވަސްވަރު މައްކާގައި ތިބޭ އެންމެހާ ދިވެހިންނަށް މި ކްލިނިކުން ފަރުވާ ހޯދޭނެ މަގު މިހާރު ވަނީ ފަހިކޮށްދީފަ އެވެ. 

ދައުލަތުގެ މީޑިއާއަށް ަމއުލޫމާތު ދެއްވަމުން ހައްޖު ކޯޕަރޭޝަންގެ ޑެޕިއުޓީ މެނޭޖިން ޑިރެކްޓަރ އަލްއުސްތާޒު އަލީ ޝަރީފް ވިދާޅުވީ، މިކްލިނިކްގެ ހިދުމަތް މައްކާގައި ތިބޭ ކޮންމެ ދިވެއްސަކަށް ވެސް ހައްޖު އުމްރާގެ ދުވަސްވަރު ލިބޭނެކަމަށެވެ.

މި ކުލިނިކް ގާއިމުކޮށްފައިވަނީ މައްކާގެ އަބީރު ހޮސްޕިޓަލާ ގުޅިގެން، ހާޖީން ތިބޭ ހައްޖު ކޯޕަރޭޝަންގެ ހޮޓަލުގަ އެވެ. ސިއްހީ ފުރިހަމަ ނިޒާމެއް އެ ކްލިނިކުގައި ގާއިމުކޮށްފައިވާކަމަށް ސަރުކާރުން މީގެ ކުރިން ވަނީ ބުނެފަ އެވެ.