މޯލްޑިވްސް އިމިގްރޭޝަނުން ފޯރުކޮށްދޭ ހިިދުމަތްތަކުގައި ޒަމާނީ ޓެކްނޮލޮޖީގެ އެކި ވަސީލަތްތައް ބޭނުންކުރުމާއެކު ހިދުމަތްތައް ޑިޖިޓައިޒްކޮށް ބޮޑު ހެޔޮ ބަދަލުތަކެއް ފާއިތުވި ދެ އަހަރެއްހައި ދުވަހުގެ ތެރޭގައި ގެނެސްފައިވާކަމަށް ދާހިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން ވިދާޅުވެއްޖެއެވެ. 

އެ ވުޒާރާއާއި ވުޒާރާގެ ދަށުން ހިންގަމުންދާ އިދާރާތަކުގެ މަސައްކަތްތަކާ ގުޅޭ މައުލޫމާތު ދެއްވުމަށް ރައީސް އޮފީހުގައި މިއަދު ވަޒީރު ކުރިއަށްގެންދެވި ނޫސްވެރިންގެ ބައްދަލުވުމުގައި އެމަނިކުފާނު ވިދާޅުވެފައިވަނީ، އިމިގްރޭޝަނުން ފޯރުކޮށްދޭ ހިދުމަތްތައް ޑިޖިޓައިޒްކޮށް، ކައުންޓަރުތަކާ ހަމައަށް އަންނަންނުޖެހި ހިދުމަތް ފޯރުކޮށްދިނުމަށް ގިނަ މަސައްކަތްތަކެއް ފާއިތުވި މުއްދަތުގައި ކުރެވިފައިވާ ކަމަށެވެ. 

އެގޮތުން ފާއިތުވި އަހަރުގެ ނޮވެންބަރު މަހުން ފެށިގެން އީ-ވިސާގެ ހިދުމަތް ތައާރަފުކުރެވިފައިވާކަން ފާހަގަކުރައްވަމުން ވަޒީރު ވިދާޅުވީ ފާއިތުވި މުއްދަތުގައި 63،000 މީހުންނަށް އެ ހިދުމަތް ފޯރުކޮށްދެވިފައިވާ ކަމަށެވެ. އޭގެ ތެރޭގައި ހިމެނެނީ ރާއްޖޭގައި އުޅެމުން ގޮސް ވިސާ އާކުރަންޖެހުނު މީހުންނާއި އަލަށް ރާއްޖެއަށް އައި މީހުންނެވެ. 

"ކުރީގައި ނަމަ މި 63،000 ޕާސްޕޯޓު ޖެހޭނީ އިމިގްރޭޝަނުގެ ކޮންމެވެސް އޮފީހަކަށް ގެންނަން. އަދި އެ ޕާސްޕޯޓުތައް ހިފައިގެން ދިވެހި ކޮންމެވެސް ރައްޔިތުންތަކެއް ޖެހޭނީ އިމިގްރޭޝަނުގެ ކައުންޓަރުތަކަށް ދާން. މިހާރު އެހުރިހާ ބޭފުޅުން މިތަނަށް ނައިސް ހިދުމަތް ލިބޭނެ ގޮތް މިއޮތީ ފަހިކުރެވިފައި،" އިހުސާން ވިދާޅުވިއެވެ. 

އޭގެ އިތުރަށް ވެލާނާ އިންޓަނޭޝަނަލް އެއާޕޯޓުގައި އީ-ގޭޓުތައް ހަރުކޮށް، އެކެއް ޖަނަވަރީން ފެށިގެން ރާއްޖެއިން ބޭރަށް އަދި ބޭރުން ރާއްޖެއަށް އަންނަ ދިވެހިންނަށް އީ-ގޭޓުގެ ޒަރީއާއިން ކްލިއަރެންސް ހިދުމަތް ދޭން ފަށާފައިވާ ކަމަށެވެ. 

އެއްވެސް ދަތިކަމެއް ނެތި އުދަގުލެއް ތަހައްމަލުކުރަންނުޖެހި ރާއްޖެއަށް އަންނަ ފަތުރުވެރިންނަށްވެސް ކްލިއަރެންސް ހިދުމަތް ހަމަޖައްސައިދިނުމުގެ ގޮތުން އިތުރު 10 އީ-ގޭޓު އެރައިވަލް ހޯލުގައި އަދި އިތުރު 10 އީ-ގޭޓު ޑިޕާޗާ ހޯލުގައި ބަހައްޓައި ހާޑްވެއާ މަސައްކަތްތައް ފުރިހަމަކޮށް ސޮފްޓްވެއާ މަސައްކަތްތައް ކުރިއަށްދާކަމަށް ވަޒީރު ވިދާޅުވިއެވެ. އެމަނިކުފާނު ވިދާޅުވީ މި އަހަރުގެ އޭޕްރީލު އެއްވަނަ ދުވަހުން ފެށިގެން އެ ގޭޓުތަކުން ހިދުމަތްދޭން ފަށާނެ ކަމަށެވެ. 

އިހުސާން އިތުރަށް ވިދާޅުވީ އޮޕަަރޭޝަން ކުރަނގިގެ ދަށުން 240،000 އަށްވުރެ ގިނަ ބިދޭސީންގެ ބައޯމެޓްރިކް ޑާޓާ ނެގިފައިވާއިރު، އެ ހުރިހާ އެންމެންގެ މޫނު ދެނެގަތުމަށް ބޭނުންވާ ޑޭޓާ އެއްކޮށް، މޫނު ދެނެގަންނަ ސޮފްޓުވެއާއެއް ތައްޔާރުކޮށް ބޭނުންކުރަން ފަށާފައިވާ ކަމަށެވެ. 

"މީގަ އަލީގައި އަޅުގަނޑުމެންގެ އެންފޯސްމެންޓު އޮފިސަރުން މީހަކާ އެންގޭޖުވާއިރު އެއީ ކާކުކަން ނޭނގިގެން އުޅެންނުޖެހޭނެ. މީގެ ކުރިން ވަރަށް ގިނައިން ދިމާވާކަމެއް، ބައެއްފަހަރު ޑެޑް ބޮޑީއެއް ފެންނައިރު އަދި އޮޕަރޭޝަންތަކުގައި މީހަކު ހައްޔަރުކުރާއިރުވެސް ކާކުކަން ނޭނގޭ،" އިހުސާން ވިދާޅުވިއެވެ. 

ރާއްޖޭގެ އިދާރާތަކުން ދެމުންދާ ހިދުމަތްތައް ޑިޖިޓައިޒްކުރުމާއި، ހިދުމަތްތައް ދިނުމުގައި އެންމެ ޒަމާނީ ވަސީލަތްތައް ބޭނުންކުރެވޭނެ އިންތިޒާމު ހަމަޖެއްސުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވަރަށް ބޮޑަށް އިސްކަންދެއްވާ ކަމެކެވެ.