ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ވެރިކަމުން ފާއިތުވި ދެ އަހަރެއްހައި ދުވަހުގެ ތެރޭގައި ރާއްޖޭގެ ޖަަލުތަކަށް 400 މީހުންގެ ޖާގަ އިތުރުކުރެވިފައިވާކަމަށާއި، އެ މަސައްކަތް މި ސަރުކާރުން ކުރީ ނިމުނު ދައުރުގައި ޖަލަށް ޖާގަ އިތުރުކުރުމަށް ހަރަދުކުރި މިންވަރަށްވުރެ އެތައް ގުނައެއް ކުޑަ ހަރަދަކުންކަމަށް ދާހިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން ވިދާޅުވެއްޖެއެވެ. 

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އެ ވުޒާރާގެ ދަށުގައި ހުރި އިދާރާތަކުން ކުރަމުންދާ މަސައްކަތްތަކުގެ މައުލޫމާތު ދެއްވަމުން ވަޒީރު ވިދާޅުވީ  މި ސަރުކާރު ވެރިކަމާ ހަވާލުވިއިރު ކުރިމަަތިވެފައި އޮތް އެންމެ ބޮޑު އެއް ގޮންޖެހުމަކީ ޖަލުގެ ޖާގައިގެ ދަތިކަންް ކަމަށެވެ. 

އެ މައްސަލަ ކުރިމަތިވި ގޮތުގެ ތަފުސީލު ދެއްވަމުން ވަޒީރު ވިދާޅުވީ މާލޭގައި ހުރި 350 އެއްހައި މީހުންގެ ޖާގައިގެ ޖަލެއް ކައިރީ ސްކޫލެއް އެޅުމަށްފަހު، ސްކޫލެއް ކައިރީ ޖަލެއް ހިންގުމަކީ އެކަށީގެންވާ ކަމެއް ނޫންކަމަށް ބުނެ ކުރީ ސަރުކާރުން އެ ޖަލު ބަންދުކުރި ކަމަށެވެ. ވަޒީރު ފާހަގަކުރެއްވި ގޮތުގައި އެޖަލަކީ ރާއްޖޭގައި ގާއިމުކުރެވިފައި ހުރި އެންމެ ވަސީލަތްތައް ތަނަވަސް ރަނގަޅު ޖަލެވެ. އޭގެ އިތުރަށް ކަސްޓޯޑިއަލް ޖަލެއްގެ ގޮތުގައި ބޭނުންކުރަމުން އައި 100 އެއްހައި މީހުންގެ ޖާގައިގެ ޖަލެއްވެސް ކުރީ ސަރުކާރުން ތަޅައިލިކަން ވަޒީރު ފާހަގަކުރެއްވިއެވެ. 

"އެކީ ޖުމްލަ ގާތްގަނޑަކަށް 450 މީހުން ގައިދުކުރެވޭނެ ޖާގަ މުޅި ކަރެކްޝަންސް އަދި ކަސްޓޯޑިއަލް އިންފްރަސްޓްރަކްޗާގެ ތެރެއިންވަނީ ދުއްވާލާފަ. މި ޖާގަތަކުގައި ތިބި ގައިދީން ވަނީ އިންތިހާބުތަކާ ގުޅިގެން ދޫކޮށްލާފައިކަން އެނގިވަޑައިގަންނަވާނެ،" ވަޒީރު ވިދާޅުވިއެވެ. 

ވަޒީރު އިތުރަށް ވިދާޅުވީ މިގޮތަށް ދޫކޮށްލި މީހުންގެ ތެރެއިން އަލުން ގައިދުކުރަންޖެހޭ މީހުންނާއި އެނޫނަސް އެކި ސަބަބުތަކާހުރެ ގައިދުކުރަންޖެހޭ މީހުން ބަންދުކޮށް ގައިދުކުރުމަށް ކުރިމަތިވި އެންމެ ބޮޑު ގޮންޖެހުމަކީ ގައިދުގައި މީހުން ބައިތިއްބާނެ ޖާގަތައް ނިޒާމުގެ ތެރެއިން ގެއްލިގެން ދިއުމެވެ. 

އެ މައްސަލަަ ހައްލުކުރުމަށް ކަރެކްޝަންސްގެ މުވައްޒަފުންނާއި ގައިދުގައި ތިބި މީހުން ކުރި ބުރަ މަސައްކަތުން ފާއިތުވި ދެ އަހަރެއްހައި ދުވަހުގެ ތެރޭގައި 400 އެއްހައި ޖާގަ ޖަލަށް އިތުރުކުރެވިފައިވާ ކަމަށް ވަޒީރު ވިދާޅުވިއެވެ. އަދި އަލަށް އިތުރުކުރެވުނު ޖާގަތައްވެސް ފުރުމާ ގާތަށް ގައިދުކުރަންޖެހޭ މީހުން ގައިދުކޮށް މިހާރު އެ މީހުންނަށް ދޭންޖެހޭ ހިދުމަތްތައް ދެމުންދާކަމަށްވެސް ވިދާޅުވިއެވެ. 

"އަޅުގަނޑު ފާހަގަކޮށްލަން އަޅުގަނޑުމެންނާ ހަވާލުވިއިރުވެސް 100 އެއްހައި މީހުން ބަންދުކުރެވޭ މިންވަރުގެ ޖަލު ގޮޅި ބަރިއެއް ހެދުމުގެ މަސައްކަތް ދިޔައީ ކުރަމުން. އެ މަސައްކަތުގެ އަގަކީ 39 މިލިއަން ރުފިޔާކަން ނިމިދިޔަ ސަރުކާރުން އެ ޕްރޮޖެކްޓު ހަވާލުކުރި ތަފުސީލުތައް ބަލައިލުމުން އަޅުގަނޑުމެންނަށް ފެނޭ. މިދިޔަ ގާތްގަނޑަކަށް ހަތަރު މަހެއްހައި ދުވަސްތެރޭ އަޅުގަނޑުމެންވާނެ ހުޅުމާލޭގައި 100 މީހުންގެ ޖާގައިގެ ޖަލެއް ނުވަތަ އިންފްރަސްޓްރަކްޗާއެއް ހަދާފައި މުޅި މި މަސައްކަތަށް ހަރަދުވީ ފަސް ވަރަކަށް މިލިއަން ރުފިޔާ،" ވަޒީރު ވިދާޅުވިއެވެ. 

މިފަދަ އުމްރާނީ ވަސީލަތްތައް ގާއިމުކުރުމަށް ބޮޑެތި ހަރަދުތަކެއް ކުރީ ސަރުކާރުގައި ކުރެވިފައި އޮތް ނަމަވެސް އެތަންތަން ނިންމައި ހިދުމަތަށް ނެރެވިފައި ނުވާކަން ވަޒީރު ފާހަގަކުރެއްވިއެވެ. 

ޖަލުގެ ޖާގަ އިތުރުކުރުމުގެ އިތުރަށް ޖަލުގެ ތެރެއިން ސްކޭމުތައް ހިންގުން ހުއްޓުވުމަށްޓަކައި ފާއިތުވި މުއްދަތުގައި ކުރެވުނު މަސައްކަތްތަކުގެ ތަފުސީލުވެސް ވަޒީރު ދެއްވިއެވެ. އެގޮތުން ޖަލުގައި އެންމެ ފަހުގެ ސްކޭނަރެއް ބަހައްޓައި ޖަލަށް ޒިޔާރަތްކުރާ މީހުންނާއި ގައިދީންނާއި ޖަލުގެ މުވައްޒަފުންވެސް ޖަލަށް ވެއްދުން މަނާ އެއްޗެއް ނުވައްދާކަން ކަށަވަރުކުރެވޭނެ އިންތިޒާމު ހަމަޖެހިގެން ގޮސްފައިވާކަން ވަޒީރު ފާހަގަކުރެއްވިއެވެ. 

އޭގެ އިތުރަށް ޖަލަށް ކުރިމަތިވެފައިވާ ހުރިހާ މައްސަލަތަކަށް އެކަށީގެންވާ ހައްލެއް ހޯދުމުގެ ގޮތުން ޒަމާނީ ފެންވަރުގެ ސެންޓްރަލް ޖަލެއް ގާއިމުކުރުމުގެ މަސައްކަތްވެސް ވަރަށް ހަލުއިކޮށް ކުރެވެމުންދާކަމަށް ވަޒީރު ވިދާޅުވިއެވެ. އެ ޖަލު ވެގެންދާނީ އެންމެ ފަހުގެ އުސޫލުތަކާ އެއްގޮތަށް ހިންގާ ޖަލަކަށް ކަމުގައި އޭނާ ވިދާޅުވިއެވެ.