މާލެ ސިޓީގެ މޭޔަރުކަމުގެ މަޤާމަށް އިދިކޮޅު އެމްޑީޕީގެ ބޭފުޅަކު އިންތިޚާބުވީ ހިސާބުން، މާލޭގެ ތަރައްޤީގެ އެތައް ކަމެއް އެމްޑީޕީގެ މޭޔަރު ހުއްޓުވާފައިވާކަމަށް ރައްޔިތުންގެ މަޖިލީހުގެ ފުނަދޫ ދާއިރާގެ މެންބަރު މުޙައްމަދު މަމްދޫޙް ވިދާޅުވެއްޖެއެވެ. 

މަމްދޫޙް މިފަދައިން ވިދާޅުވީ، ޕީޕަލްސް ނޭޝަނަލް ކޮންގްރެސް (ކޮންގްރެސް ޕާޓީ) ގެ ގަލޮޅު އުތުރު ދާއިރާގެ ޖަގަހަ ހުޅުވުމަށް ރޭ ބޭއްވި ޙަފްލާގައި ވާހަކަދައްކަވަމުންނެވެ. 

ރޭ ޖަގަހަ ހުޅުއްވައިދެއްވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު އެވެ. 

ޙަފްލާގައި ވާހަކަދައްކަވަމުން މަމްދޫޙް ވިދާޅުވީ، 2021 ވަނަ އަހަރު މާލޭގެ މޭޔަރުކަމުގެ މަޤާމަށް، އަދުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންތިޚާބުވި ހިސާބުން މާލޭގެ މައްސަލަތަކަށް ޙައްލު ގެނައުމަށް އެމަނިކުފާނު ގިނަ މަސައްކަތްޕުޅުތަކެއް ކުރެއްވި ކަމަށެވެ. މޭޔަރުކަމުގައި އެމަނިކުފާނު ހޭދަކުރެއްވި ދެ އަހަރާއި ހަ މަސް ދުވަހުގެ ތެރޭގައި ފެއްޓެވި މަސައްކަތްޕުޅު މިއަދު އެމްޑީޕީގެ މޭޔަރަކު ވަޑައިގެން ހުއްޓުވާލާފައިވާކަމަށް މަމްދޫޙް ވިދާޅުވިއެވެ. 

"2021 ގައި މޭޔަރުކަމަށް މިއަދުގެ ރައީސުލްޖުމްހޫރިއްޔާ ޑރ. މުޢިއްޒު މާލޭގެ ލޮބުވެތި ރައްޔިތުން އިންތިޚާބުކުރި ހިސާބުން އަޅުގަނޑުމެންނަށް ފެނުނީ ތަރުތީބު ކުރެވިގެން މާލެއަށް ޒަމާންތަކެއް ވަންދެން ދިމާވެފައި ހުރި މައްސަލަތަކަށް ޙައްލު ގެނައުމަށް އެމަނިކުފާނު ކުރައްވަމުން ގެންދެވި މަސައްކަތްޕުޅު، އަދި އެއާ އެކީގައި މާލޭގެ ލޮބުވެތި ރައްޔިތުން އެދުނު ބަދަލުތައް އެމަނިކުފާނަށް ލިބުނު ގާތްގަނޑަކަށް ދެ އަހަރާއި 6 މަހެއްހާ ދުވަހުގެ ތެރޭގައި ގެނެސްދެއްވި މަންޒަރު" މަމްދޫޙް ވިދާޅުވިއެވެ. 

މަމްދޫޙް ވިދާޅުވީ، ތަފާތު މުހިއްމު ކަންތައްތަކެއް ކުރުމަށް ރޭވި، ލިޔެވި އެކަމަށް ބޭނުންވާ ހުރިހާ ފަންނީ އެހީތެރިކަމެއް ހޯދާފަ އޮތް ދަނޑިވަޅެއްގައި އެމްޑީޕީއަށް އަނެއްކާވެސް ކައުންސިލުގެ މޭޔަރުގެ ގޮނޑި ލިބުމާ ހިސާބުން ފެނިގެންދިޔައީ އޭރު، މިއަދުގެ ރައީސުލްޖުމްހޫރިއްޔާ މޭޔަރުކަމުގައި ހުންނަވައިގެން މާލޭގެ ލޮބުވެތި ރައްޔިތުންނަށް ފަސޭހަކޮށްދެއްވުމަށް ކޮށްދެއްވުމަށް ކުރެއްވި ބުރަ މަސައްކަތްޕުޅުތަކަށް ހުއްޓުމެއް އައި މަންޒަރު ކަމަށެވެ. 

މެންބަރު މަމްދޫޙް ވިދާޅުވީ، ފެނިގެންދަނީ ގަސްތުގައި ސަރުކާރަށް ކަންތައްތައް ނުވާކަން ދެއްކުމަށް، ރައްޔިތުންގެ މެދުގައި ސަރުކާރަށް ނަފްރަތު އުފެއްދުމަށް އެމްޑީޕީގެ މޭޔަރެއް މިއަދު ހުރީތީ މަސައްކަތްކުރަމުންދާ މަންޒަރު ކަމަށެވެ. 

ސިޔާސީ ވިސްނުމެއްގައި އެމްޑީޕީގެ މޭޔަރު މަސައްކަތްކުރުމާއެކު މާލޭގެ ރައްޔިތުންނަށް ބޭނުންވާ އެތައް ކަމެއް އޮތީ ހުއްޓިފައިކަން މަމްދޫޙް ފާހަގަކުރެއްވިއެވެ. މިކަން ބަދަލުކުރެވޭނީ އޭޕްރީލް 4 ވަނަ ދުވަހު ނަގާ ވޯޓުން ކަމަށާއި، އެ ވޯޓުގައި މާލޭގެ މޭޔަރުކަމަށް މޫސާ ޢަލީ ޖަލީލަށް ވޯޓުދެއްވުމަށް މެންބަރު މަމްދޫހް ގޮވާލެއްވިއެވެ. 

މަމްދޫޙް ވިދާޅުވީ، ކާމަރުކަޒީ ޤާނޫނު ތަންފީޒުކުރެވޭ ގޮތުން، ކައުންސިލްގެ މެޖޯރިޓީ ވަކި ޕާޓީއަކަށް ލިބިފައި ވީނަމަވެސް ކައުންސިލް އެތުރިގެންދާނީ މޭޔަރާ އެކު ކަމަށެވެ. އެހެންވެ، ކަންކަން ލަސްކުރުމުގެ ބާރު މޭޔަރަށް ލިބިގެންވާއިރު އެ ފުރުޞަތު ކުރިއަށް އޮތް އިންތިޚާބުގައި އެމްޑީޕީއަށް ނުދިނުމަށް މެންބަރު އެދިވަޑައިގަތެވެ. 

ރާއްޖޭގެ ވެރިކަން 2023 ވަނަ އަހަރު ރައްޔިތުން ބަދަލުކުރީ، އެމްޑީޕީން ހިންގަމުންދިޔަ ނާގާބިލު ސަރުކާރުން ބަދަލުކުރަން ރައްޔިތުން ބޭނުންވުމުން ކަމަށް މަމްދޫޙް ވިދާޅުވިއެވެ. އެދުވަހު ރައްޔިތުން ނިންމި ނިންމުމުގެ މައިގަނޑު ސަބަބުތައް އަދުގެ ސަރުކާރުން ދަނީ ޙާޞިލްކުރަމުން ކަމަށް މަމްދޫޙް ވިދާޅުވިއެވެ.