ވެރިކަންކުރާ ޕީޕަލް ނޭޝަނަލް ކޮންގްރެސް ޕާޓީއަށް ރައްޔިތުންގެ މަޖިލީހުގެ ސުޕަ މެޖޯރިޓީ ރައްޔިތުން ދިނުމުން އެ އަޣުލަބިއްޔަތު ބޭނުންކުރަމުންދަނީ ރަނގަޅަށް ކަމަށާއި، ދިވެހިރާއްޖޭގެ އިގުތިސާދަށް ބޮޑު ގެއްލުމެއް ލިބޭނެކަަމެއް ކޮންގްރެސްގެ ސުޕަ މެޖޯރިޓީން ކޮށްފައިނުވާ ކަމަށް އިގުތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ. 

މިއަދު ރައީސް އޮފީހުގައި އޮތް ނޫސްވެރިންގެ ބައްދަލުމުގައި ނޫސްވެރިޔަކު ދެންނެވި ސުވާލަކަށް ޖަވާބުދެއްވަމުން ސައީދު ވިދާޅުވީ މިހާރުގެ އިދިކޮޅު އެމްޑީޕީއަށް ސުޕަ މެޖޯރިޓީ ލިބުމުން ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން އެދިގެން ހަރަދަށް ޒިންމާވުމުގެ ގާނޫނުގެ ތިން މާއްދާއެއް ސަސްޕެންޑުކޮށް ބޭނުން މިންވަރަކަށް ފައިސާ ޗާޕުކޮށް، ދަރަންޏަށް ފައިސާ ނަގަމުންދިޔަ ކަމަށެވެ. 

އެއިރުފައިސާ ޗާޕުކުރުމުން އިގުތިސާދަށް ކުރިމަތިވާނެ ދަތިތަކާ އަންނާނެ ލޮޅުންތަކާ ގުޅޭ ގޮތުން މަރުކަޒީ ބޭންކުގެ ގަވަނަރާ ބައްދަލުކުރެއްވުމަށް  މަޖިލީހުގެ އިގުތިސާދީ ކޮމިޓީގެ މެންބަރެއްގެ ހައިސިއްޔަތުން އެދިވަޑައިގެންނެވިކަމަށާއި، ބައްދަލުނުކުރެއްވިތާ، ގަވަނަރަށް ފޮނުއްވި އެއްވެސް ސިޓީއަކަށްވެސް ޖަވާބުނުދެއްވި ކަމުގައި ސައީދު ވިދާޅުވިއެވެ. 

ސައީދު ވިދާޅުވީ ކޮވިޑް-19އާ ގުޅިގެން ފައިސާ ޗާޕުކުރަންޖެހުނުކަމަށް އެމްޑީޕީން ބުނާއިރު އެއިރުގެ ސަރުކާރުން ކޮވިޑާ ގުޅިގެން ކުރި ހަރަދަށްވުރެ އިތުރުވާ މިންވަރަށް ބޭރުގެ އެހީގެ ގޮތުގައި ސަރުކާރަށް ފައިސާ ލިބުނު ކަމަށެވެ. އޭނާ ތުހުމަތުކުރެއްވި ގޮތުގައި އެއިރު ފައިސާ ޗާޕުކުރީ އިންތިހާބުތައް ކާމިޔާބުކުރުމަށް ހަރަދުކުރުމުގެ މަގުސަދުގައެވެ. އަދި އެކަމުގެ ހެކީގެ ގޮތުގައި ސައީދު ދެއްކެވީ ކޮމަންޑޫ އަދި ގުރައިދޫގެ މަޖިލިސް ބައި-އިލެކްޝަނުގައި އެއިރުގެ ސަރުކާރުން ކުރަމުންދިޔަ އާދަޔާ ހިލާފު ހަރަދެވެ. 

ސައީދު ވިދާޅުވީ މި ސަރުކާރުން ފައިސާ ޗާޕުކުރުން ހުއްޓައިލުމަކީ ޑޮލަރުގެ ކުރިމަތީގައި ދިވެހި ރުފިޔާގެ އަގު ހިފަހެއްޓުމަށް ލިބުނު ފުރުސަތެއް ކަމަށެވެ. އިދިކޮޅު އެމްޑީޕީން އުންމީދުކުރަމުން އައީ އެ ޕާޓީން ފައިސާ ޗާޕުކުރަމުން އައި ގޮތަށް އެކަން ކުރަމުންގޮސް ރާއްޖެ ބަނގުރޫޓުވާނެ ކަމަށް ކަމުގައި ސައީދު ވިދާޅުވިއެވެ. 

"އޭޕްރީލް މަސް މިއޮށް އައިސް ހަމަވަނީ. އޭޕްރީލު މަހުގައި އަދާކުރަންޖެހޭ ސުކޫކުގެ ފައިސާ ދެއްކުމާމެދު އެއްވެސް ކަންބޮޑުވުމެއް ނެތްކަމަށް ރައީސް ވިދާޅުވަނީ، އެހެންވީމާ ކިހައި ރަނގަޅުތޯ އަޅުގަނޑުމެންނަށް ސުޕަ މެޖޯރިޓީ ލިބުނުކަން؟،" ވަޒީރު ވިދާޅުވިއެވެ. 

އޭގެ އިތުރަށް އެއާ އެމްބިއުލާންސްގެ ހިދުމަތް ފެށުމާއި، މޯލްޑިވިއަންއަށް ވައިޑް ބޮޑީ މަތިންދާބޯޓު ގެނައުމާއި ދުންފަތުގެ ޖެނެރޭޝަނަލް ބޭންއާއި، ވޭޕު މަނާކުރުން ފަދަ ކަންކަމަކީ މި ސަރުކާރުގެ ކާމިޔާބުތަކުގެ ގޮތުގައި ސައީދު ފާހަގަކުރެއްވިއެވެ. އެއާޕޯޓުތައް އެޅެމުންދާއިރު ކުރިން ފެރީގެ ހިދުމަތް ނެތް އަތޮޅުތަކަށް އާރްޓީއެލް ހިދުމަތް މިހާރު ފުޅާކުރެވިފައިވާކަންވެސް ފާހަގަކުރެއްވިއެވެ. 

ރިޒާވް އެއް ބިލިއަން ޑޮލަރަށްވުރެ މަތިވެފައިވާއިރު ދެ މިލިއަން ޑޮލަރު ހުރި އެސްޑީއެފްގައި މިހާރު 300 އެތައް މިލިއަން ޑޮލަރު ހުރިކަން ފާހަގަކުރައްވަމުން ސައީދު ވިދާޅުވީ ސުޕަ މެޖޯރިޓީ ބޭނުންވީ އެކަންކަން ހާސިލުކުރުމަށް ކަމަށެވެ.

"އެހެންވީމާ ސުޕަ މެޖޯރިޓީގެ ބޭނުން ފުރިހަމައަށް ހިފާ ސަރުކާރެއް މިއީ. މަޖިލިސް ލިބުނުކަން ރަނގަޅު. މަޖިލިސް ބޭނުންކޮށްގެން އިގުތިސާދު އިތުރަށް ގޯސްވާނެ ކަމެއް ނުކުރޭ،" ސައީދު ވިދާޅުވިއެވެ.