ނ.ވެލިދޫގެ ބިމުގެ ޖާގައިގެ ދަތިކަން ހައްލުކުރުމަށް އެ ރަށުގައި ހިއްކަމުންދާ ސަރަހައްދު އަންނަ ފެބްރުއަރީ މަހުގެ ނިޔަލަށް ހިއްކައި ނިމޭނެކަމަށް އެ މަސައްކަތް ހަވާލުކޮށްފައިވާ އެމްޓީސީސީން ބުނެފިއެވެ. 

އޮޑިފަހަރު ބަނުން ފަދަ ބައެއް ސިނާއީ މަސައްކަތްތައް ފުޅާ ދާއިރާއެއްގައި ހިންގާ ވެލިދޫގައި އެ މަސައްކަތްތައް މިހާރު ކުރަމުން އަންނަނީ ރަށު ތެރޭގައި މީހުން ދިރިއުޅޭ ސަރަހައްދުގައެވެ. ފައިބަރު ފަދަ ވަސީލަތްތަައް ބޭނުންކޮށްގެން މި މަސައްކަތްކުރާއިރު، މިއީ މީހުންގެ ދުޅަހެޔޮކަމަށް ނޭދެވޭ އަސަރުކުރާ ކަމެކެވެ. 

ނިމުނު އަހަރުގެ ޖުލައި މަހު ނ.އަތޮޅަށް ކުރެއްވި ދަތުރުފުޅުގައި ވެލިދޫއަށް ވަޑައިގެން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުވަނީ ވެލިދޫގައި މިފަދަ މަސައްކަތްތަކަށް ހާއްސަ ބިމެއް ހިއްކަވައިދެއްވާނެ ކަމުގައި އިއުލާނުކުރައްވާފައެވެ. އެއީ އެ ރަށުގެ ރައްޔިތުން އެމަނިކުފާނުގެ އަރިހުން އެދެމުންއައި ކަމެކވެެ. 

އެ މަޝްރޫއުގެ ދަށުން ރަށުގެ ހުޅަނގު ބިތަށް 2.7 ހެކްޓަރުގެ ބިން އިތުރުކުރުމަށްޓަކައި ބިން ހިއްކަމުންދާއިރު، ބިން ހިއްކުމަށް އަޅަންޖެހޭ ވެލިއަޅައި އޯގަސްޓު މަހު ނިންމާލާފައިވެއެވެ. މިހާރު ކުރިއަށްދަނީ ހިއްކި ބިން ހިމާޔަތްކުރުމަށް ޖިއޯ ބޭގް ޖެހުމުގެ މަސައްކަތެވެ. 

ދައުލަތުގެ މީޑިޔާއަށް އެމްޓީސީސީން މައުލޫމާތު ދީފައިވާ ގޮތުން މި މަޝްރޫއުގެ 90 އިންސައްތަ މަސައްކަަތް މިހާރުވަނީ ނިމިފައެވެ. އަދި އަންނަ މަހުގެ ނިޔަލަށް ބާކީ ހުރި ހުރިހާ މަސައްކަތެއް ނިމޭނެ ކަމުގައި އެ ކުންފުނިން ބުނެއެވެ. 

ބިމުގެ ދަތިކަން އޮތް ވެލިދޫގައި ސަފާރީ އޮޑިފަހަރު ބަނުން ފަދަ މަސައްކަތްތައް ކުރާނެ ވަކި ސަރަހައްދެއް ގާއިމުކުރެވުމަކީ ރަށުގެ ރައްޔިތުންގެ ދުޅަހެޔޮކަމަށް ރަނގަޅު އަސަރެއްކުރާނެ ކަމެކެވެ. އަދި އޮޑިފަހަރު ބަނުމުގެ ސިނާއަތް އެ ރަށުގައި އިތުރަށް ފުޅާކުރުމަށްވެސް މަގުފަހިވާނެ ކަމެކެވެ.