ފަތިސް ނަމާދުން ދުވަސް ފެށުމަށް ކިޔަވާ ކުދިންނަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އިލްތިމާސް ކުރައްވައިފިއެވެ.

ހުޅުމާލޭގެ ދެވަނަ ފިޔަވަހީގައި ބިނާކޮށްފައިވާ ޝަހީދު ޢަލީ ސްކޫލް ހުޅުއްވައި ދެއްވައި، އެމަނިކުފާނު ވިދާޅުވީ ދިވެހިންނަކީ މާތްވެގެންވާ އިސްލާމް ދީނުގައި ސާބިތުވެތިބޭ ބަޔަކަށްވާއިރު، އަހަރެމެން ވާންޖެހޭނީ އަބަދުވެސް އެކަން ހަނދާންކޮށް އިސްލާމް ދީނުގައި ކަނޑައަޅާފައި އޮންނަ ގޮތަށް ކަންކަން ތަރުތީބުކޮށް ކޮންމެ ދުވަހެއް ކޮންމެ ވަގުތެއްވެސް އެގޮތުގައި ހޭދަކުރާ ބަޔަކަށްކަމަށެވެ. 

މައިންބަފައިންގެ ކިބައިން ވެސް ރައީސް މުއިއްޒު އެދިވަޑައިގެންނެވީ، ހުރިހާ ކިޔަވާ ކުދިން ދުވަސް ފަށަނީ ފަތިސްނަމާދުންކަން ޒިންމާއެއްގެ ގޮތުގައި ކަށަވަރުކުރުމަށެވެ.

ދީނުގައި ކަންތައްތައް އޮންނަނީ ހަމައެކަނި ފޮތެއްގައި ލިޔެފައިއެއް ނޫން ކަމަށާއި އެކަންކަމަކީ ޒިންމާއެއްގެ ގޮތުގައި އަމަލީ ގޮތުން ކޮންމެ ދުވަހަކު ކުރުމަށްޓަކައި އޮންނަ ކަންތައްތައް ކަމަށް އެމަނިކުފާނު ވިދާޅުވިއެވެ.

ދިރާސީ އައު އަހަރު މިއަދު ފެށިއިރު، ސަރުކާރުގެ 219 ސްކޫލުގައި 80،715 ދަރިވަރުން ކިޔަވަމުން ގެންދެއެވެ.

އެމަނިކުފާނު ވަނީ އެ ހުރިހާ ދަރިވަރުންނަށާއި މުދައްރިސުންނަށް ވެސް ތަހުނިޔާ ދަންނަވާފައެވެ.