‏އިސްލާމްދީނަށާއި ދިވެހި ޤައުމަށް ލޯބިކުރާ، އުޅުމާއި ސުލޫކު ރަނގަޅު، ހަރުދަނާ އަދި ހީވާގި ދަރީންތަކެއް މި ޤައުމުގައި ބިނާކުރެވޭނީ، ތަޢުލީމާއި ތަރުބިއްޔަތަށް އަހައްމިއްޔަތުކަން ދީގެންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މިއަދު ފެށި ދިރާސީ އައު އަހަރުގެ ތަހުނިޔާ ފޮނުއްވަވައި މީސް މީޑިއާގައި ހިއްސާކުރެއްވި ޕޯސްޓެއްގައެވެ.

ރައީސުލްޖުމްހޫރިއްޔާ ވަނީ، މި އަހަރަށް ސްކޫލްތަކުގެ ކިޔެވުން މިއަދު ފެށުމާއެކު، ތަޢުލީމީ ދާއިރާގެ އެންމެހާ ހިންގުންތެރީންނަށާއި ޓީޗަރުންނަށް، ބެލެނިވެރީންނަށާއި ލޮބުވެތި ދަރިވަރުންނަށްވެސް ކާމިޔާބީއަށް އެދިވަޑައިގެންފައެވެ.

ރައީސް ވިދާޅުވީ ތަޢުލީމު އުނގެނުމާއި އުނގަންނައިދިނުމަކީވެސް ވަރަށް ބޮޑު ދީނީ އަދި ޤައުމީ ޒިންމާއެއްކަމަށާއި، ދިވެހީން އެދޭ ފާގަތި ކުރިމަގު މި ޤައުމަށް ހޯދައިދެވޭނީ މި ޒިންމާ އަދާކުރުމުގައި އެންމެން އެއްބާރުލައި އިޚްލާޞްތެރިވީ މިންވަރަކުންކަމަށެވެ.

77 ހާހަށްވުރެ ގިނަ ދަރިވަރުންނާއެކު މިއަދު ވަނީ 218 ސްކޫލެއްގައި ކިޔަވައިދޭން ފަށާފައެވެ. ތަޢުލީމީ އައު އަހަރަށް ރާއްޖޭގެ ހުރިހާ ސްކޫލެއްވެސް ވަނީ ވަރަށް ބޮޑަށް ތައްޔާރުވެފައެވެ. ސަރުކާރުން އަންނަނީ ތަޢުލީމީ ދާއިރާއަށް ވަރަށް ޚާއްޞަ އަހަމިއްޔަރުކަމެއް ދެއްވައި އެދާއިރާ ކުރިއެރުވުމަށް ގިނަ މަސައްކަތްތަކެއް ކުރައްވަމުންނެވެ.