އަތޮޅުތެރޭގައި އިސްރަށްވެހިންނަށް ޚާއްޞަ ޖާގަތަކެއް ތަރައްޤީކުރުމަށް ކުރާ މަސައްކަތުގައި، މިހާތަނަށް 77 ރަށު ކައުންސިލަކުން ޝައުގުވެރިކަން ފާޅުކޮށްފައިވާކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ. 

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ޑރ. ޢާއިޝަތު ޝިހާމް ވިދާޅުވީ، ރާއްޖޭގެ އާބާދީ ބަދަލުވެގެންދާގޮތުން 2030 ވަނަ އަހަރު އަންނައިރު، މިހާރު އޮތް އިސްރަށްވެހިންގެ އާބާދީ ދެގުނަވެގެންދާނެ ކަމަށެވެ. 

މާލެ އާއި ހުޅުމާލޭގައި އިސްރަށްވެހިންގެ ނާދީ ހުޅުވައި، އެ މަސައްކަތް ވަރަށް ކާމިޔާބުކަމަށް ވަޒީރު ވިދާޅުވިއެވެ. އެގޮތުން އަމިއްލަ ޖަމިއްޔާތަކާއި އިދާރާތައް ގުޅިގެން ކުރެވޭ މަސައްކަތާއެކު، އިސްރަށްވެހިންގެ ބައިވެރިވުން އިތުރުކުރެވޭކަން ވަޒީރު ފާހަގަކުރެއްވިއެވެ. 

މާލެ ސަރަޙައްދެކޭ އެއްގޮތަށް އަތޮޅުތަކުގައި ވެސް އިސްރަށްވެހިންނަށް ޖާގަތައް ހެދުމުގެ މަސައްކަތް އެ ވުޒާރާއިން އަންނަނީ ކުރަމުންނެވެ. 

ވަޒީރު ވިދާޅުވީ އަތޮޅުތެރޭގައި އިސްރަށްވެހިންނަށް ޚާއްޞާ ޖާގަތައް ޤާއިމުކުރުމުގެ އިތުރުން، ނާދީއެއް ހިންގޭނެ ތަންތަނުގައި ނާދީ އުފެއްދުމުގެ މަސައްކަތް ވެސް ކުރަމުންގެންދާ ކަމަށެވެ. އަދި، އުއްމީދަކީ މާލޭގެ ނާދީއިން ރައްޔިތުންނަށް ލިބޭ ހިތްހަމަޖެހުން އަތޮޅުތަކުން ވެސް ލިބިގެންދިއުމަށް ކަމަށް ވަޒީރު ވިދާޅުވިއެވެ.

ވަޒީރު ޑރ. ޢާއިޝަތު ޝިހާމް އެ ވުޒާރާއާ ޙަވާލުވެވަޑައިގަތުމަށްފަހު ގެންނެވި އެއް ބަދަލަކީ، އާއްމުން ގުޅުމަށް 1433 ހޮޓްލައިން ގާއިމްކުރުމެވެ. އަދި، ކުޑަކުދިންގެ މައްސަލަތައް ހުށަހެޅުމަށް ޚާއްޞަކޮށްފައިވާ 1412 އާއި ބޮޑެތި މީހުންގެ މައްސަލަތައް ރިޕޯޓްކުރުމަށް 1421 އެ ވުޒާރާއިން އަންނަނީ ހިންގަމުންނެވެ.

މިއަދުގެ ނޫސްވެރިންގެ ބައްދަލުވުމުގައި ވަޒީރު ވިދާޅުވީ އެ ވުޒާރާގެ މަސައްކަތް ބައްޓަންކުރަނީ ރައްޔިތުންނާ ވީހާވެސް ގާތުން މަސައްކަތްކުރެވޭ ގޮތަށް ކަމަށެވެ. އެގޮތުން މިއަހަރުގެ ޖަނަވަރީ މަހުން ފެށިގެން އޮކްޓޫބަރު މަހުގެ ނިޔަލަށް 17،000 އަށް ވުރެ ގިނަ ފޯންކޯލް ހޮޓްލައިން ނަންބަރުތަކަށް ލިބިފައިވާކަން ވަޒީރު ފާހަގަކުރެއްވިއެވެ.

ނޫސްވެރިންގެ ބައްދަލުވުމުގައި ވަޒީރު ވިދާޅުވީ އެ ވުޒާރާގެ މަސައްކަތް ކާމިޔާބުވުމުގެ ސަބަބަކީ މާލެ އާއި އަތޮޅުތެރޭގެ މުވައްޒަފުން އިހްލާސްތެރިކަމާއެކު ކުރާ މަސައްކަތް ކަމަށެވެ. އަދި، އެވުޒާރާގެ މަސައްކަތަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވާ ސަމާލުކަމަކީ ކާމިޔާބުވުމަށް ލިބޭ ހިތްވަރެއް ކަމަށް ވަޒީރު ވިދާޅުވިއެވެ.