މިހާރު ކުރިއަށްދާ ދިރާގު ދިވެހި ޕްރިމިއަރ ލީގުގައި މިއަދު ހަވީރު ކުޅުނު މެޗުގައި ފަހަތުންއަރައި ނިއު ރޭޑިއަންޓް ސްޕޯޓްސް ކްލަބު 2-1 އިން ބަލިކޮށް، މާޒިޔާ ސްޕޯޓްސް އެންޑް ރެކްރިއޭޝަން ފުރަތަމަ ބުރުގައި ފުރިހަމަ ރެކޯޑަކާއެކު ނިންމާލައިފިއެވެ.

މި ނަތީޖާއާއެކު މާޒިޔާ އިން ވަނީ ފުރަތަމަ ބުރުގައި ކުޅުނު ނުވަ މެޗުން 27 ޕޮއިންޓް ހަމަކޮށްފައެވެ. އޭގެ 8 ޕޮއިންޓް ފަހަތުން ދެވަނައިގައި އޮޑި ސްޕޯޓްސް ކްލަބު އޮތީ އެއް މެޗު މަދުން ކުޅެގެންނެވެ. ތިންވަނައިގައި ނިއު އޮތީ 17 ޕޮއިންޓާއެކު އެވެ.

ގަލޮޅު ރަސްމީ ދަނޑުގައި މިއަދު ހަވީރު ކުޅުނު މެޗު ފެށިގެން ނުވަވަނަ މިނެޓުގައި ނިއު އިން ލީޑު ނެގީ ގިލާމެ ޑަ ސިލްވާގެ ގޯލުންނެވެ.

ނިއު އިން ލީޑުގައި އޮވެ، ހާފު ނިމެންދަނިކޮށް މި ހާފުގެ އިތުރު ވަގުތުގެ ތެރޭގައި މާޒިޔާ އަށް އެއްވަރުކޮށްދިނީ އަހުމަދު އައިހަމް އެވެ.

ދެވަނަ ހާފުގެ ކުރީކޮޅު، ނިއުގެ ލަންކާ ކީޕަރު، ކަވީޝް ލަކްޕްރިޔާ އަށް ލިބުނު އަނިޔާއަކާ ގުޅިގެން އިތުރަށް ކުޅުން ކުރިއަށްގެންދެވޭގޮތް ނުވުމުން ވަނީ ބަދަލުކޮށްފައެވެ. ފުރަތަމަ ހާފުގައި ވެސް ދެތިން ފަހަރެއްގެ މަތީން ކަވީޝް އަށް ވަނީ ދަނޑުމަތީގައި ފަރުވާ ދީފައެވެ. އޭނާގެ ބަދަލުގައި ފަހު ހާފުގައި ކުޅެން ނިކުތީ ޢަބްދުﷲ ޒިމާމް އެވެ.

މެޗުގައި މާޒިޔާ އިން ފުރަތަމަ ފަހަރަށް ލީޑުނެގީ، 73 ވަނަ މިނެޓުގައި ހަމްޒާ މުޙައްމަދު (ހަމްޕު) ވައްދާލި ލަނޑުންނެވެ. މިއީ އަރިމަތިން އައިހަމް ނަގައިދިން ހުރަހެއްގެ އެހީގައި ހަމްޕު ކާމިޔާބުކުރި ގޯލެކެވެ. މާޒިޔާ އިން މި ލަނޑުޖެހުމުގެ ކުޑައިރުކޮޅެއް ކުރީން، އައިހަމް ފޮނުވާލި ބޯޅައެއް ގޯލްގެ އަރިމަތީދަނޑިއަށް އަމާޒުވެފައިވެއެވެ.