މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން ބާއްވާ ޤައުމީ ބޮޑީބޯޑިން ލީގުގެ ޗެމްޕިއަންކަން އާމިން އުމަރު މޫސާ ހޯދައިފިއެވެ. 

އާމިން ލީގު ޗެމްޕިއަންކަން ކަށަވަރުކުރީ، އިއްޔެ ނިމުނު ބަނޑުފިލާ ޗެލެންޖުގައި އޭނާއާ ވާދަކުރި ޢަލީ ޚުޝްރުވާން އަޙްމަދު (ކުޑަ އައްޔަ) އަށް ވުރެ ޖުމްލަ ނަތީޖާ ރަނގަޅުކޮށްގެންނެވެ.

މިއަހަރުގެ ބަނޑުފިލާ ޗެލެންޖުން އާމިން ކެޓީ ސެމީ ފައިނަލުންނެވެ. އެކަމަކު ސީޒަނުގެ ފުރަތަމަ ދެ މުބާރާތުގެ ޗެމްޕިއަންކަން ހޯދުމާއެކު ޤައުމީ ލީގުގެ ޗެމްޕިއަންކަން އާމިންއަށް ލިބުނީ ޖުމްލަ ޕޮއިންޓުން ކުޑަ އައްޔައަށް ވުރެ ކުރި ލިބިގެންނެވެ.  

އާމިނަށް ލީގުގައި 3460 ޕޮއިންޓް ލިބުނުއިރު، ދެވަނައަށް ދިޔައީ 3440 ޕޮއިންޓް ލިބުނު ކުޑަ އައްޔަ އެވެ. ތިންވަނަ ލިބުނީ ބަނޑުފިލާ ޗެލެންޖުގެ ސެމީ ފައިނަލުގައި ކުޑަ އައްޔައާ ވާދަކޮށް ބަލިވި މުޙައްމަދު ކައިފް އެވެ. ކައިފް އަށް ލިބުނީ 2680 ޕޮއިންޓެވެ. 

ބަނޑުފިލާ ޗެލެންޖުގެ މިއަހަރުގެ ޗެމްޕިއަންކަން ހޯދީ ފައިނަލުގައި ކުޑަ އައްޔަ ބަލިކޮށް އަޝްރަފް ހަސަން އެވެ. ޤައުމީ ލީގުގައި 2610 ޕޮއިންޓާއެކު އަޝްރަފަށް ލިބުނީ ހަތަރު ވަނައެވެ. 

ޤައުމީ ލީގުގައި އެންމެ ކުރި ހޯދި ހަތަރު އެތުލީޓުންނަށް މިހާރު ވަނީ އަންނަ އަހަރުގެ ޤައުމީ ބޮޑީބޯޑިން ޓީމުގެ ސްކޮޑުން ޖާގަ ލިބިފައެވެ. 

މިދިޔަ ދެ އަހަރު ޤައުމީ ލީގު ކާމިޔާބުކުރި ޢަލީ ޖާވިދު (ޖާއްޓެ) އަށް މިފަހަރު ލިބުނީ ހަތް ވަނައެވެ. ޖާއްޓެ ލީގު ނިންމާލީ 2340 ޕޮއިންޓާއެކު އެވެ. 

ބަނޑުފިލާ ޗެލެންޖުގައި މިހާރު ކުރިއަށްދަނީ ޑްރޮފްނީ އަދި މާސްޓާސް ބައިގެ ހީޓުތަކެވެ.