އިސްރާއީލްގެ ވަޒަންވެރިންގެ ސަލާމަތަށް ހުރަސްއެޅޭކަމަށް ބުނެ، ފަލަސްތީނުގެ ހުޅަނގު އައްސޭރިން 3,000 ޒައިތޫނި ގަސް ކަނޑާލައިފިއެވެ.

ރާމަالله ކައިރީގައި އޮންނަ އަލް-މުޣައްޔިރު އަވަށުގެ 0.27 އަކަކިލޯމީޓަރުގެ ސަރަޙައްދެއްގައިވާ ފަލަސްތީނު މީހުން ދިރިއުޅެމުންދާ ސަރަހައްދުގެ އަވަށެއްގައި ހުރި ޒައިތޫނި ގަސްތައް ބިމާހަމަކުރުމުގެ މަސައްކަތް އިސްރާއީލްގެ ސިފައިން ފަށާފައިވާއިރު، މި އަވަށަކީ ފަލަސްތީނަށް ނިސްބަތްވާ 4،000 މީހުން އުޅެމުންދާ ސަރަހައްދެކެވެ.

މި ގަސްތައް ކަންޑާލުމަށް އިސްރާއީލްގެ ސިފައިން ދެއްކި ބަހަނާއަކީ، މި ގަސްތަކުގެ ސަބަބުން އެ ބިމުގައި ދިރިއުޅޭ ޔަހޫދީ ވަޒަންވެރިން ދަތުރުކުރާ މަގެއްގެ ސަލާމަތަށް "ނުރައްކާ" ކުރިމަތިވުމެވެ. 

މި ކަމާ ގުޅޭގޮތުން އެ އަވަށުގެ ކައުންސިލްގެ ނައިބު މަރުޒޫކް އަބޫ ނައީމް ފަލަސްތީނުގެ ވަފާ ނިއުސް އޭޖެންސީއަށް މައުލޫމާތު ދެއްވަމުން ވިދާޅުވީ، ޒައިތޫނި ގަސްތައް ކެނޑުމުގެ އިތުރުން ޔަހޫދީ ސިފައިން ދަނީ އެ އަވަށުގައި ދިރިއުޅެމުންދާ ފަލަސްތީނު ރައްޔިތުންގެ ގެތައް ވެސް ބިމާ ހަމަކުރަމުން ކަމަށެވެ. އަދި މިހާތަނަށް 30 އަށްވުރެ ގިނަ ގެ ބިމާ ހަމަކޮށްލާފައިވާއިރު، އެމީހުންގެ އުޅަނދުތައް ވެސް ހަލާކުކޮށްލާފައިވާ ކަމަށް އޭނާ ވިދާޅުވިއެވެ.

ފަލަސްތީނުގެ މީހުންނަށް ޒައިތޫނި ގަހަކީ އެ ޤައުމުގެ ސަޤާފަތް ރަމްޒުކޮށްދޭ ޚާއްޞަ ނިޝާނެކެވެ. ޒައިތޫނި ގަސް އިންދުމަކީ ފަލަސްތީނުގެ އިގްތިސާދާއި ސަގާފަތުގެ މުހިންމު ބަޔެކެވެ.

ފަލަސްތީނުގެ އަމިއްލަވަންތަކަމަށް ހުރަސްއަޅައި ޒައިތޫނި ގަސްތައް ކެނޑުމަކީ ޒަމާނުއްސުރެ ޔަހޫދީން ކުރަމުންދާ ކަމެކެވެ.

މިކަމުގެ ބޭނުމަކީ ފަލަސްތީނު ރައްޔިތުން އެމީހުންގެ ބިން ދޫކޮށްލުމަށް މަޖުބޫރުކުރުވުމެވެ.

އިސްރާއީލްގެ ހައްދުފަހަނަޅާފައިވާ ސިފައިން 2023 ވަނަ އަހަރު ޣައްޒާގައި ޖަރީމާތައް ހިންގަން ފެށިފަހުން، ހުޅަނގު އައްސޭރިން ފަލަސްތީނު ރައްޔިތުން ބޭރުކުރުމުގެ މަސައްކަތް ވަނީ ފަށައިފައެވެ.

މީގެ މައިގަނޑު ބޭނުމަކީ ޔަހޫދީންނަށް ބޯހިޔާވަހިކަން ހޯދައިދިނުމެވެ. 

އިސްރާއީލްގެ ބޮޑުވަޒީރު ބެންޖަމިން ނަތަންޔާހޫ ވަނީ ޔަހޫދީންނަށް ބޯހިޔާވަހިކަން ފޯރުކޮށްދިނުމަށް ފަލަސްތީނުގެ ބިންތަކުގައި ބިޔަ މަޝްރޫޢުއެއް ކުރިއަށްގެންދާނެކަން އިއުލާނުކޮށްފައެވެ. ނަތަންޔާހޫގެ މި މަޝްރޫޢު ބައިނަލްއަޤްވާމީ މުޖުތަމައުއިން ދަނީ ކުށްވެރިކުރަމުންނެވެ.