ވެރިކަމުގައި ހުންނެވި ދުވަސްވަރު ދައުލަތުގެ ފައިސާ ނަހަމަގޮތުގައި ބޭނުންކުރެއްވި ކަމުގެ ތުހުމަތުގައި ސްރީ ލަންކާގެ ކުރީގެ ރައީސް ރަނިލް ވިކްރަމަސިންހަ މިއަދު ހައްޔަރުކޮށްފި އެވެ.

ރަނިލްގެ މައްޗަށް ތުހުމަތު ކުރަނީ ރައީސްކަމުގައި ހުންނެވި އިރު ދައުލަތުގެ ފައިސާ އިން ގައުމުން ބޭރަށް ކުރެއްވި ދަތުރަކާ ގުޅިގެންނެވެ. ރަނިލް މިހާރު ވަނީ ކްރިމިނަލް އިންވެސްޓިގޭޝަން ޑިޕާޓްމަންޓް (ސީއައިޑީ) އަށް ބަޔާން ދެއްވައިފަ އެވެ.

ލަންކާގެ އިގްތިސާދު އެންމެ ބޮޑަށް އަޑިއަޅާލި ކަންތައް ގަނޑާ ގުޅިގެން ރައީސްކަމުގެ މަގާމުން ގޯޓާބަޔާ ރާޖަޕަކްސާ އިސްތިއުފާ ދެއްވުމާ ގުޅިގެން ރަނިލް ވަނީ 2022 އިން 2024 އަށް ރައީސްކަމުގެ މަގާމާ ހަވާލުވެވަޑައިގެންފަ އެވެ. ލަންކާގެ އިގްތިސާދު އަޑިގަނޑުން އަރައިގަތުމުގައި ރަނިލް ވަނީ މުހިންމު ދައުރެއް އަދާކުރައްވައިފަ އެވެ. ރަނިލް ވަނީ ލަންކާގެ ބޮޑުވަޒީރުގެ މަގާމު ހަ ފަހަރެއްގެ މަތިން އަދާކުރައްވައިފަ އެވެ.

ލަންކާގެ ރައީސްކަމުގެ މަގާމުގައި ހުންނެވި ދުވަސްވަރު ރަނިލް ވަނީ ގައުމުން ބޭރަށް 23 ދަތުރެއް ކުރައްވައިފަ އެވެ. މި ދަތުރުތަކަށް ވަނީ 600 މިލިއަން ރުޕީސް (2 މިލިއަން ޑޮލަރު) ޚަރަދުވެފަ އެވެ. 

އުމުރުން 76 އަހަރުގެ ރަނިލް ހައްޔަރުކޮށްފައި ވަނީ 2023 ވަނަ އަހަރު ޖީ77 ގެ ސަމިޓުގައި ބައިވެރިވެވަޑައިގަތުމަށް ކިއުބާ އަށް ކުރެއްވި ދަތުރުފުޅަށް ފަހު އިނގިރޭސިވިލާތުގައި މަޑުކުރެއްވި ދަތުރަކާ ގުޅިގެންނެވެ. އެ ދަތުރުގައި ރަނިލް އާއި އަނބިކަނބަލުން ވަނީ ވުލްވާހެމްޓަން ޔުނިވާސިޓީގައި އޮތް ރަސްމިއްޔާތެއްގައި ބައިވެރިވެވަޑައިގެންފަ އެވެ. 

ސީއައިޑީން ތުހުމަތު ކުރަނީ އިނގިރޭސިވިލާތަށް ރަނިލް ކުރެއްވި ދަތުރަކީ އަމިއްލަ ދަތުރެއް ކަމަށާއި ނަމަވެސް އެ ދަތުރަށް ވަނީ ދައުލަތުގެ ފައިސާ ޚަރަދުކޮށްފައި ކަމަށެވެ. ނަމަވެސް އެކަން ރަނިލް ދޮގު ކުރައްވަ އެވެ. 

ރަނިލް އަކީ ލަންކާގައި ހައްޔަރުކުރި ފުރަތަމަ ކުރީގެ ރައީސް އެވެ.

ރަނިލް އަކީ ލަންކާގައި ސިޔާސީ ގޮތުން ބާރުގަދަ ބޭފުޅެކެެވެ. ގާނޫނީ ވަކީލެއް ކަމަށްވާ ރަނިލް އަކީ ލަންކާގައި ސިޔާސީ އަދި ވިޔަފާރީގެ ގޮތުން ނުފޫޒުގަދަ އާއިލާއަކަށް ނިސްބަތްވާ ބޭފުޅެކެވެ. 

ލަންކާގެ ޔުނައިޓެޑް ނޭޝަނަލް ޕާޓީ (ޔޫއެންޕީ)ގެ ލީޑަރުކަމާ ރަނިލް ހަވާލުވެވަޑައިގަތީ 1994 ވަނަ އަހަރު އެވެ. އޭގެ ފަހުން ރަނިލް ވަނީ ޕާޓީގެ ތެރޭން ކޮރަޕްޝަނާ ދެކޮޅަށް މަސައްކަތް ކުރައްވައިފަ އެވެ.