ENGLISH
30 އޯގަސްޓު 2025
ރަޝިޔާއިން ތެޔޮ ގަންނާތީ އިންޑިޔާގެ މުދަލުން ނަގާ ޓެރިފު ޓްރަމްޕު ބޮޑުކުރައްވަނީ
04 އޯގަސްޓު 2025
|
ޓްރަމްޕާއި އިންޑިޔާގެ ބޮޑުވަޒީރު ނަރެންދުރަ މޯދީ، ފޮޓޯ: ރޮއިޓާސް
އިންޑިޔާއިން ރަޝިޔާގެ ތެޔޮ ގަތުން ހުއްޓައިނުލުމުން އެ ގައުމުގެ މުދާ އެމެރިކާއަށް އިމްޕޯޓުކުރާއިރު ނަގާ ޓެރިފު ވަރަަށް ބޮޑަށް ބޮޑުކުރައްވަން ނިންމަވާފައިވާކަމަށް އެމެރިކާގެ ރައީސް ޑޮނާލްޑް ޓުރަމްޕު ވިދާޅުވެއްޖެއެވެ.
ހޯމަދުވަހު އަމިއްލަ މީސްމީޑިޔާ މަންސަ ޓްރޫތު ސޯޝަލްގައި ކުރެއްވި ޕޯސްޓެއްގައި ޓުރަމްޕު ތުހުމަތުކުރެއްވި ގޮތުގައި ރަޝިޔާއިން ހެޔޮ އަގުގައި ތެޔޮ ގަނެ އިންޑިޔާއިން އަންނަނީ ހުޅުވާލެވިފައިވާ ބާޒާރުގައި ބޮޑު އަގުގައި އެ ތެޔޮ ވިއްކައިގެން ފައިދާ ހޯދަމުންނެވެ. އޭނާ އިތުރަށް ވިދާޅުވީ ރަޝިޔާއިން ޔޫކުރެއިނުގައި މަރަމުންދާ މީހުންގެ އަދަދު އިންޑިޔާއަށް މުހިއްމު ނުުވާ ކަމަަށެވެ.
"މިކަމުގެ ސަބަބުން، އިންޑިޔާއިން އެމެރިކާއަށް ދައްކަންޖެހޭ ޓެރިފު ވަރަށް ބޮޑަށް އިތުރުކުރަން އަޅުގަނޑު ނިންމައިފިން،" ޓުރަމްޕު ވިދާޅުވިއެވެ.
މީގެ ހަފުތާއެއްހައި ދުވަސް ކުރިން އެމެރިކާއިން ބުނެފައިވަނީ އިންޑިޔާއިން އެ ގައުމަށް އެތެރެކުރާ ހުރިހާ މުދަލަކުން 25 އިންސައްތައިގެ ޓެރިފެއް ނަގަން ފަށާނެ ކަމަށެވެ.
ރަޝިޔާއިން ތެޔޮ ގަންނާތީ އެމެރިކާއާއި ހުޅަނގުގެ ގައުމުތަކުން އިންޑިޔާއަށް ކިޔާ ފާޑުކިޔުންތަކަށް އެ ގައުމުން ރައްދު ދީފައިވެއެވެ. އިންޑިޔާއިން ބުނެފައިވަނީ ޔޫކުރެއިން ހަނގުރާމައަށްފަހުވެސް ޔޫރަޕުގެ ގައުމުތަކުން ރަޝިޔާއިން ހަކަތައާއި އެނޫންވެސް މުދާ ގަންނަމުންދާ ކަމަށެވެ.
އިންޑިޔާގެ ހާރިޖީވުޒާރާގެ ތަރުޖަމާން ރަންދިރް ޖައިސްވާލް ވިދާޅުވި ގޮތުގައި އިންޑިޔާއިން ރަޝިޔާގެ ތެޔޮ ގަނެ އިމްޕޯޓުކުރަނީ އިންޑިޔާގެ އާއްމު ރައްޔިތުންނަށް ހެޔޮ އަގުގައި ހަކަތަ ފޯރުކޮށްދިނުމުގެ މަގުސަދުގައެވެ. އަދި އެހެނިހެން ބޮޑެތި އިގުތިސާދުތަކެކޭ އެއްގޮތަށް އިންޑިޔާގެ ގައުމީ މަސްލަހަތާއި އިގުތިސާދީ ސަލާމަތް ކަށަވަރުކުރުމަށް އަޅަންޖެހޭ ހުރިހާ ފިޔަވަޅެއް އެ ގައުމުން އަޅާނެ ކަމުގައި އޭނާ ނެރުއްވި ބަޔާނުގައި ވިދާޅުވެފައިވެއެވެ.