ޔަމަނުގެ ދެކުނު އައްސޭރިފަށުން 150 އެއްހާ ހިޖުރަވެރިންނާއެކު ދަތުރުކުރި ބޯޓެއް ބަންޑުން ޖަހާލައި 54 މީހުން މަރުވެއްޖެއެވެ.

ބޯޓު އަޑިއަށް ގޮސްފައިވަނީ އަރަބި ކަނޑުގެ އަބިޔާން ޕްރޮވިންސްގެ އަހްވާރު ޑިސްޓްރިކްޓްއާ ކައިރި ހިސާބަކުންނެވެ. ބޯޓު އަޑިއަށް ދިޔަ ސަބަބެއް ކަމަށް ވަނީ މޫސުން ގޯސްވުމުންނެވެ.

އިތިއޯޕިއާގެ ނުވަ މީހަކާއި ޔަމަނުގެ އެކަކު ހިމެނޭ ގޮތަށް މިހާތަނަށް ސަލާމަތް ކުރެވިފައި ވަނީ އެންމެ 10 މީހުން ކަމަށް ޔަމަނުގެ ސިއްހީ އޮފިޝަލުން ބުނެ އެވެ.

ބޯޓުގައި ތިބި ގިނަ މީހުންނަކީ އިތިއޯޕިއާއިން ހިޖުރަކުރި މީހުންނެވެ.

އެމީހުން މަސައްކަތް ކުރީ، ވަޒީފާ ހޯދުމަށް ސައުދީ އަރަބިއްޔާ އާއި ގަލްފުގެ އެހެން ގައުމުތަކަށް ދިއުމަށެވެ.

އިންޓަނޭޝަނަލް އޯގަނައިޒޭޝަން ފޯ މައިގްރޭޝަން (އައިއޯއެމް) އިން މައުލޫމާތުދޭ ގޮތުގައި ހިޖުރަވެރިން ދަތުރުކެރަމުން ދިޔަ ރާސްތާއަކީ ދުނިޔޭގައި އޮތް އެންމެ ނުރައްކާތެރި ކަނޑުމަގެވެ.