ENGLISH

30 އޯގަސްޓު 2025

Advertisement

ރަޝިޔާއަށް ބާރުގަދަ ބިންހެލުމެއް؛ ޗައިނާ، އެމެރިކާ އަދި ޖަޕާނަށް ސުނާމީގެ އިންޒާރު

30 ޖުލައި 2025

|

ޝިފްޒާން އަޙްމަދު

ރަޝިޔާގެ އައްސޭރިފަށުގެ ސިޓީއަކަށް ސުނާމީ އަރައި ފެންބޮޑުވެފައި

ރަޝިޔާގެ އިރުމަތީގެ އައްސޭރިއަށް 8.8 މެގްނިޓޫޑުގެ ބާރުމިން ހުރި ބިންހެލުމެއް އައުމާ ގުޅިގެން ޗައިނާއާއި އެމެރިކައާއި ޖަޕާނުގެ އިތުރަށް ދެކުނު އެމެރިކާގެ ބައެއް ގައުމުތަކަށް ސުނާމީގެ އިންޒާރު ނެރެފިއެވެ. 

ރަޝިޔާއަށް އައި ބިންހެލުމުގެ ބާރުމިނަކީ 8.0 މެގްނިޓޫޑުކަމަށް ފުރަތަމަ ރިޕޯޓުކުރި ނަމަވެސް އެމެރިކާގެ ޖިއޮލޮޖިކަލް ސާވޭ (ޔޫއެސްޖީއެސް)އިން ބިންހިލުމުގެ ބާރުމިން މުރާޖައާކުރުމަށްފަހު ބުނެފައިވަނީ އެ ބިންހެލުމުގައި 8.8 މެގްނިޓޫޑުގެ ބާރުމިން ހުންނާނެ ކަމަށެވެ. 

އެ ބިންހެލުމަށްފަހު 6.9 މެގްނިޓޫޑުގެ ލޮޅުންތަކެއް އެ ސަރަަހައްދަށް އެރިކަމަށް ރެކޯޑުކުރެވިފައިވެއެވެ. އެ ބިންހެލުން އައި ސަރަހައްދުގެ އިމާރާތްތަކާއި މަގުތަކަށް ބޮޑެތި ގެއްލުންތަކެއް ލިބި، ޕްޓްރޮޕަވްލޮވްސް-ކަމްޗަޓްސްކީއޭ ކިޔުނު ސިޓީން ކަރަންޓު ކެނޑި މޯބައިލް ފޯނު ހިދުމަތަށް ބުރޫއަރާފައިވެއެވެ. 

އެމެރިކާގެ ހަވާއީގެ އިތުރަށް އެ ގައުމުގެ ސެން ފްރެންސިސްކޯގެ އައްސޭރިފަށަށް ސުނާމީގެ އަސަރުކުރާނެ ކަމުގައި ބެލެވޭތީ އިންޒާރު ނެރެފައިވެއެވެ. މިހާރުވެސް ހަވާއީއާއި ސެން ފްރެންސިސްކޯއަށް ސުނާމީ އަންނަނީ އަރަމުންނެވެ. ގިނަ އަދަދެއްގެ ބަޔަކު ހަވާއީ ދޫކޮށް ރައްކާތެރި ހިސާބުތަކަަށް ދިއުމަށް މަސައްކަތްކުރަމުން އަންނަކަން ބައިނަލްއަގުވާމީ މީޑިޔާއިން ރިޕޯޓުކޮށްފައިވެއެވެ. 

ޖަޕާނުގެ ހޮކައިޑޯއަށް ފުރަތަމަ ސުނާމީ އެރިއިރު، އެ ސަރަހައްދަށް އެރި ފުރަތަމަ ސުނާމީ ރާޅުގެ އުސްމިނުގައި 40 ސެންޓިމީޓަރު ހުރިކަމަށް މީޑިޔާއިން ރިޕޯޓުކޮށްފައިވެއެވެ. ޖަޕާނުގެ ޕެސިފިކް އައްސޭރީގެ ސަރަހައްދުތަކުން ރައްކާތެރި ތަންތަނަށް ދިއުމަށް މިހާރުވަނީ އަމުރު ނެރެފައެވެ. އެ ސަރަހައްދަށް 3 މީޓަރުގެ އުސްމިން ހުންނަ ރާޅު އަރާނެ ކަމުގައި ލަފާކުރެވެއެވެ. ޖަޕާނުގައި ރައްކާތެރި ތަންތަނަށް ދިއުމަށް އަންގާފައިވާ މީހުންގެ އަދަދު 1.9 މިލިއަނަށް އަރައެވެ. 

އެމެރިކާއަށް ބަލާއިރު ސެން ފްރެންސިސްކޯއާއި ހަވާއީގެ ރައްޔިތުން ގޮނޑުދޮށާއި ބިން ތިރި ސަރަހައްދުތަކުން ދުރަށް ދިއުމަށް އިދާރާތަކުން އަންނަަނީ އިލްތިމާސްކުރަމުންނެވެ. އެމެރިކާގައި މީހުންނަށް ބޮޑު ގެއްލުމެއް ލިބޭނެ ކަމުގައި ނުބެލެވޭތީ ދެ ސްޓޭޓުގެ ރައްޔިތުންވެސް ހަމަޖެހިގެން ތިބުމަށް ސަރުކާރުން އަންނަނީ އަންގަމުންނެވެ. 

ހަވާއީގައި ބަނދަރުކޮށްފައިވާ ހުރިހާ ވިޔަފާރި އުޅަނދެއް ބަނދަރުން ބޭރުކުރަން އެމެރިކާގެ ކޯސްޓުގާޑުން އަންގާފައިވެއެވެ. އަދި ސުނާމީ ނިމެންދެން ހަވާއީ ކައިރީ ހުރި އުޅަނދުތައް އައްސޭރިއާ ދުރުގައި ބޭތިއްބުމަށްވެސް އަންގާފައިވެއެވެ. 

ރަޝިޔާގެ އިރުމައްޗަށް ސުނާމީ އެރުމުގެ ސަބަބުން ބައެއް މީހުންނަށް އަނިޔާވެފައިވާކަން ރިޕޯޓުކޮށްފައިވެއެވެ. އަދި ސެވެރޯ-ކުރިލްސްގެ ބައެއް ސަރަހައްދުތަކަށް ސުނާމީ އަރައި ވަރަަށް ބޮޑަށް ފެންބޮޑުވެފައިވާކަމަށް ރިޕޯޓުތައް ބުނެއެވެ. 

މި ބިންހެލުމާ ގުޅިގެން ޕެރޫއާއި އެކުއެޑޯގައި ސުނާމީ އިންޒާރު ނެރެފައިވާއިރު، އިންޑޮނޭޝިޔާއާއި ފިލިޕީންސަަށްވެސް ސުނާމީގެ އަސަރުކުރާނެ ކަމުގައި އަންދާޒާކޮށްފައިވެއެވެ. 

ކިޔުންތެރިންގެ ހިޔާލު