ސްރީލަންކާގެ ކުރީގެ ރައީސް އަދި ނުފޫޒުގަދަ ސިޔާސީ ލީޑަރު މަހިންދަރާޖަޕަކްސާގެ ދަރިކަލުން ނަމާލް ރާޖަޕަކްސާ ހައްޔަރުކޮށް ކޯޓަށް ހާޒިރު ކުރުމުގެ އަމުރެއް އެ ޤައުމުގެ ކޯޓަކުން ނެރެފި އެވެ.

ނަމާލް ހައްޔަރު ކުރަން އަމުރުކޮށް މިފަދަ އެންގުމެއް އެ ޤައުމުގެ ކޯޓަކުން ނެރުނީ 2015 ވަނަ އަހަރު ބިމެއް ދޫކުރި މައްސަލައާ ގުޅިގެން ނަމާލްގެ މައްޗަށް ހިންގާ ޝަރީޢަތަށް ކޯޓަށް ހާޒިރުނުވާތީ އެވެ.

މި އަމުރު ނެރުނުއިރު ނަމާލް ހުންނެވީ ދިވެހިރާއްޖޭގަ އެވެ. އޭނާ ރާއްޖެ ވަޑައިގެންނެވީ މިއަދު ހެނދުނު ކަމަށް ލަންކާގެ މީޑިއާތަކުން ރިޕޯޓް ކުރެ އެވެ. ނަމާލް, ރާއްޖެ ވަޑައިގެންނެވީ ސްރީލަންކާގެ ރައީސް އަނޫރާ ކުމާރާ ޑިސަނާޔަކެ، ފުރަމާނަ ދަތުރުފުޅެއްގައި މިއަދު ރާއްޖެ ވަޑައިގެންނެވި ފްލައިޓުން ކަމަށް ވެސް އެ ރިޕޯޓްތަކުގައިވެ އެވެ.

ރިޕޯޓްތައް ބުނާ ގޮތުން ނަމާލް ރާއްޖެ ވަޑައިގެންނެވީ އޭނާގެ ގާތް ދިވެހި އާއިލާއެއްގެ ކައިވެނި ޕާޓީގައި ބައިވެރިވުމަށެވެ. ނަމާލް އަކީ ވަރަށް ގިނަ ދިވެހީންނާއި ވަކީން ޚާއްސަކޮށް ސިޔާސީ ބޭފުޅުންނާއި ވަރަށް ގާތް ގުޅުމެއް ބާއްވަވާ ބޭފުޅެކެވެ.

ނިމިގެންދިޔަ ލަންކާގެ ރިޔާސީ އިންތިޚާބުގައި ވެސް ވާދަކުރެއްވި ނަމާލް އަކީ އޭނާގެ ބައްޕަ ރާޖަޕަކްސާ އަދި ބޮޑުބޭބެ ގޮތަބަޔާގެ ވެރިކަމުގައި އެންމެ ނުފޫޒުގަދަ ޒުވާން ސިޔާސީ ލީޑަރެވެ. އެ ޤައުމުގެ ޔޫތު މިނިސްޓަރު ކަމާއި ޕާލިމަންޓްގެ ގޮނޑި ފުުރުއްވާފައިވެ އެވެ.