ENGLISH
30 އޯގަސްޓު 2025
ޣައްޒާގައި އެހީ ބަހާ މަރުކަޒުތަކުގެ ދޮށުގައި ޝަހީދުކޮށްލި މީހުންގެ އަދަދު 1،000އަށް ވުރެ މައްޗަށް
23 ޖުލައި 2025
|
ފަލަސްޠީނުގެ ޣައްޒާގައި އެހީ ބަހާ މަރުކަޒުތަކަށް އެއްވާ މީހުންނަށް ޙަމަލާދީ ޝަހީދުކޮށްލާފައިވާ މީހުންގެ އަދަދު 1،000 އަށް ވުރެ އިތުރުވެފައިވާކަމަށް އދ.އިން ބުނެފިއެވެ.
ޣައްޒާ ހިޔުމެނިޓޭރިޔަން ފައުންޑޭޝަން (ޖީއެޗްއެފް)ގެ ނަމުގައި މިދިޔަ ފެބްރުއަރީ މަހު އުފެއްދި ޖަމްޢިއްޔާއިން އެހީ ބެހުމުގެ މަސައްކަތް ފެށިފަހުން، އެކި ސަރަޙައްދުތަކުގައި ހަމަނުޖެހުންތައް ބޮޑުވެ، ބަޑިޖަހައި އެތައް ބަޔަކު ވަނީ ޝަހީދުކޮށްލައިފައެވެ.
އދ.ގެ އިންސާނީ ޙައްޤުތަކާބެހޭ އޮފީހުން ބުނީ، އެހީ ބަހާ މަރުކަޒުތަކުގެ ދޮށުގައި ޝަހީދުކޮށްލާފައިވާ މީހުންގެ އަދަދު، ޖުލައި 21 އާ ހަމައަށް 1،054 އަށް އަރާފައިވާ ކަމަށެވެ.
ޣައްޒާއަށް ހުއްޓުމެއްނެތި އިޒްރޭލު ސިފައިން ޢުދުވާނުތައް ދެމުންދާއިރު، އިއްޔެ އެކަނިވެސް ޣައްޒާގެ އެކި ހިސާބުތަކުގައި 43 މީހަކު ވަނީ ޝަހީދުކޮށްލައިފައެވެ.
ޖީއެޗްއެފް އުފެއްދީ ޣައްޒާއަށް އެހީ ފޯރުކޮށްދިނުމުގެ ކޮންޓްރޯލް އިޒްރޭލާއި އެމެރިކާގެ އަތް ދަށަށް ގެނައުމަށް ކަމަށް ބުނެ ބައިނަލްއަޤުވާމީ ގިނަ ފަރާތްތަކުން ދަނީ ތަކުރާރުކޮށް ކަންބޮޑުވުން ފާޅުކުރަމުންނެވެ.
އަދި މިކަމުގެ ތަޖުރިބާއެއް ނެތި، އެހީ ބެހުމުގެ އިންތިޒާމް ދޯހަޅިކަމުން، އެހީ ބަހާ ސަރަޙައްދުތަކުގައި ލޫޓުވުމާއި ބޮޑެތި ހަމަނުޖެހުންތައް ދަނީ ހިނގަމުންނެވެ.
ކާބޯތަކެއްޗާއި ބޭސް ޣައްޒާއިން މުޅިންހެން ހުސްވެ، އެތަނުގައި ދިރިއުޅޭ 2.3 މިލިއަން ރައްޔިތުން ބަނޑަށްޖެހޭނެކަމުގެ އިންޒާރު ދޭން ފެށުމުން، އިޒްރޭލުން މިހާރު ވަނީ އެހީ ވެއްދުމުގެ ފުރުޞަތު ކޮންމެވެސް ވަރަކަށް ދީފައެވެ.
ނަމަވެސް، އިޒްރޭލުން ރާވާފައިވަނީ ޣައްޒާއަށް ކިރިޔާ ފުދޭވަރަށް އެހީ ވައްދަން ފުރުޞަތު ދޭ ގޮތަށެވެ.
ޣައްޒާގައި ކާބޯތަކެތީގެ ދަތިކަން އިންތިހާއަށް ކުރިމަތިވެފައިވާއިރު، ހައިހޫނުކަމުގައި ކޮންމެ ދުވަހަކު އެތައް ބަޔަކު ޝަހީދުވަމުންދާ ކަމަށް ވެސް އދ.ގެ ކަމާބެހޭ ޖަމިއްޔާތަކުން ވަނީ ބުނެފައެވެ. އޭގެ ތެރޭގައި ގިނައީ ކުޑަކުދިން ކަމަށް ވެސް އެ ޖަމާޢަތްތަކުން ބުނެފައިވެއެވެ.