ބަަންގުލަދޭޝްގެ ވެރިރަށް ޑާކާގެ ކޮލެޖެއްގެ ކެމްޕަހުގެ އިމާރާތްތަކެއްގެ މައްޗަށް އެ ގައުމުގެ ވައިގެ އަސްކަރިއްޔާގެ ހަނގުރާމަމަތީ މަތިންދާބޯޓެއް ވެއްޓުނު ހާދިސާގައި މަރުވި މީހުންގެ އަދަދު 27 އަށް އަރާފައިވާކަމަށް އެ ޤައުމުގެ ސިއްޙީ ވުޒާރާއިން ބުނެފިއެވެ.

ޗައިނާގެ ޖޭ-7 ފައިޓާ މަތިންދާބޯޓުގެ މަރުކާއެއް ކަމުގައިވާ އެފް-7ބީޖީއައި މަރުކާގެ މި ބޯޓު މައިލްސްޓޯން ސްކޫލް އެންޑް ކޮލެޖުގެ ކެމްޕަހުގެ ތެރެއަށް ވެއްޓުނީ ތަމްރީނު ދަތުރަކަށް އިއްޔެ މެންދުރު 1:06 ހާއިރު ފުރައިގެން ދަތުރުކުރަން ފެށިތާ ކުޑަ ވަގުތުކޮޅެއް ފަހުންނެވެ.

އެ ބޯޓު ވެއްޓުނީ ކްލާސްތައް ނިންމާފައި ދަރިވަރުންތައް ނުކުތް ވަގުތު ކަމަށާއި، މަރުވި މީހުންގެ ތެރޭގައި ގިނައީ އެ ސްކޫލްގެ ދަރިވަރުން ކަމަށް އިދާރާތަކުން ބުނެފައިވެއެވެ.

އެ ހާދިސާގައި އިތުރު 170 މީހަކު ވަނީ ޒަޚަމްވެފައެވެ.

ބަންގްލަދޭޝްގެ ސިއްޙީ ވުޒާރާގެ އޮފިޝަލަކު ވިދާޅުވީ، އެ ހާދިސާގައި މަރުވި 27 މީހުންގެ ތެރެއިން 25 އަކީ ސްކޫލްގެ ދަރިވަރުން ކަމަށާއި، ބޯޓު ދުއްވަން އިން ޕައިލެޓު ވެސް މަރުވެފައިވާ ކަމަށެވެ.

އެ ހާދިސާގައި ޒަޚަމްވި މީހުންގެ ތެރެއިން 78 މީހަކަށް އެކި ހޮސްޕިޓަލުތަކުގައި ފަރުވާ ދެމުން އަންނަ ކަމަށް ވެސް އޭނާ ވިދާޅުވިއެވެ.

އެ ބޯޓު ވެއްޓުނީ، ކުއްލިއަކަށް ދިމާވި މައްސަލައެއްގައި ކަމަށާއި ނަމަވެސް، އެކަން ހިނގަން މެދުވެރިގޮތް ތަޙުޤީގުކުރަމުންދާ ކަމަށް ބަންގްލަދޭޝްގެ އަސްކަރިއްޔާއިން ބުނެފައިވެއެވެ.

ބޯޓުގެ ކޮންޓްރޯލް ގެއްލުމުން، މީހުން ދިރިއުޅޭ ސަރަޙައްދުން ދުރަށް ދާން ޕައިލެޓު މަސައްކަތް ކުރި ކަމަށާއި، ނަމަވެސް، އެކަން ނާކާމިޔާބުވެ ބޯޓު އަމާޒުވީ، ދެ ބުރިއަށް ހުންނަ ކެމްޕަސް އިމާރާތަށް ކަމަށް އަސްކަރިއްޔާއާ ޙަވާލާދީ ބައެއް މީޑިއާތަކުން ރިޕޯޓުކޮށްފައިވެއެވެ.