ENGLISH
06 މާރިޗު 2026
Advertisement
ހެއްކާއެކު ޝުޖާއު: ރައްޔިތުން އިންތިހާބުތަކާ ދުރުކުރީ އެމްޑީޕީން
06 މާރިޗު 2026
|
މެމްބަރު ޝުޖާއު . ފޮޓޯ؛ޕީއެންސީ
Advertisement
އެންމެ މަޤްބޫލު
ކޮންގްރެސް ޕާޓީން ވާހަކަ ދައްކާނީ ހެއްކާއި އެކުގައި ކަމަށާއި ރައްޔިތުން އިންތިހާބުތަކާ ދުރުކުރުމުގެ ވިސްނުން އުފެއްދި ޕާޓީއަކީ ވެސް އަދި އެގޮތަށް އަމަލުކޮށް ރައްޔިތުން އިންތިހާބުތަކާ ދުރުކުރީވެސް އިދިކޮޅު އެމްޑީޕީން ކަމަށް ކޮންގްރެސް ޕާޓީގެ ނާއިބު ރައީސް އަދި ބާރަށު ދާއިރާގެ މެމްބަރު އިބްރާހީމް ޝުޖާއު ވިދާޅުވެއްޖެ އެވެ.
ޝުޖާއު މިފަދައިން ވިދާޅުވީ "ދިވެހީންގެ ރާއްޖެ" ޕްރޮގްރާމުގައި ބައިވެރިވަޑައިގެން ރިޔާސީ އިންތިހާބާއި މަޖިލިސް އިންތިހާބު އެއް ދުވަހެއްގައި ބޭއްވުމަށް ސަރުކާރުން ނިންމީ ރައްޔިތުން އިންތިހާބުތަކާ ދުރުކުރަން ކަމަށް ބުނެ އެމްޑީޕީން ދައްކަމުން އަންނަ ވާހަކަތަކަށް ރައްދު ދެއްވަމުން ނެވެ.
ޝުޖާއު ވިދާޅުވީ އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ އިންތިހާބުތައް ބޭއްވުމަށް ފަހު އެ މެމްބަރުންގެ ތެރެއިން ބަޔަކު އިސްތިއުފާ ދޭން ފެށުމާއެކު މި އިންތިހާބުތަކުގެ ބައި-އިލެކްޝަންތައް އަހަރަކު އެއް ފަހަރު ބާއްވަން ނިންމީ އެމްޑީޕީން ކަމަށެވެ.
"މި ކިހިނެއްތޯ މި ހެއްދެވީ. އިންތިހާބުތަކާ ރައްޔިތުން ދުރުކުރީ އެމްޑީޕީން ނޫންތޯ؟. އެބޭފުޅުންގެ ހެޔޮ ނިޔަތެއް އޮތް ނަމަ ހަމަ 60 ދުވަހުގެ ތެރޭގައި އިންތިހާބު ބާއްވަންވީ ނޫންތޯ؟. ޑަބުލިއުޑީސީގެ މެމްބަރުން އިސްތިއުޖފާ ދޭންފެށީމަ ގާނޫނަށް ބަދަލު ގެނެސްގެން އެއް އަހަރު ދުވަސް ފަހުން ހުސްވާ ގޮޑިތަކަށް މީހުން އިންތިހާބު ކުރަން ނިންމާލީ. ރައްޔިތުން އިންތިހާބާ ކައިރިތޯ މިވީ؟ ދުރެއް ނޫންތޯ މިކުރީ. އެކަން ކުރީ ކޮން ބައެއްތޯ؟ އެމްޑީޕީން ނޫންތޯ؟. އަޅުގަނޑުމެންގެ ވިސްނުމަކީ އިންތިހާބުތަކާ ރައްޔިތުން ކައިރި ކުރުން. " - ކޮންގްރެސް ޕާޓީގެ ނާއިބު ރައީސް އަދި ބާރަށު ދާއިރާގެ މެމްބަރު އިބްރާހީމް ޝުޖާއު
ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބުގެ އިތުރުން ލޯކަލް ކައުންސިލް އިންތިހާބު އެކީގައި ބާއްވަން ފެނިވަޑައިގަންނަވާކަމަށް ކުރީގެ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް 2020 ވަނަ އަހަރު ވިދާޅުވެފައިވާ ކަމަށާއި ހަގީގީ އެމްޑީޕީގެ ފިކުރަކީ އެއީ ކަމަށް ޝުޖާއު ވިދާޅުވި އެވެ.
"އަޅުގަނޑުމެން އެކަން ކުރަން އުޅޭތީ އެބޭފުޅުން މި އުޅެނީ އެބޭފުޅުންގެ ހަގީގީ ވިސްނުމާ ވެސް ދެކޮޅުވެގެން. އަޅުގަނޑުމެންގެ ވިސްނުމަކީ ދެ އިންތިހާބު އެއް ދުވަހެއްގައި ބާއްވާފައި ދައުރު މެދުތެރެއިން ލޯކަލް ކައުންސިލް އިންތިހާބު ބޭއްވުން. " - ކޮންގްރެސް ޕާޓީގެ ނާއިބު ރައީސް އަދި ބާރަށު ދާއިރާގެ މެމްބަރު އިބްރާހީމް ޝުޖާއު
ޝުޖާއު ވިދާޅުވީ ރައްޔިތުންގެ ފެންނަ ނުފެންނަ ވޯޓަކަށް ދިއުމަށް ސަރުކާރުން ނިންމާފައިވާ އެންމެ ބޮޑު އެއް ސަބަބަކީ މަޖިލީހުގެ ބޭނުން ނަހަމަގޮތުގައި ހިފުމުގެ ވިސްނުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނުގެންގުޅުއްވާތީކަމަށެވެ.
މައި ދެ އިންތިހާބުގައި ވޯޓުލާން ނުކުންނަ މީހުންގެ އާބާދީއަށް ބަލާއިރު ރިޔާސީ އިންތިހާބުގެ ހަ މަސް ފަހުން އޮންނަ މަޖިލީސް އިންތިހާބުގައި ވޯޓުލާން ނުކުންނަ މީހުންގެ އަދަދު ބޮޑުތަނުން މަދުވާކަން ފާހަގަކުރައްވައި ދިވެހި ދައުލަތުގެ ނިޒާމު ތަރުތީބުކުރެވިގެން އަންނައިރު ވީހާވެސް ފުޅާ ދާއިރާއެއްގައި ރައްޔިތުންނަށް ފުރުސަތު ދީގެން ގޮތް ނިންމަން ރައީސް ބޭނުންފުޅުވާ ކަމަށް ޝުޖާއު ވިދާޅުވި އެވެ.
މައި ދެ އިންތިހާބު އެއް ދުވަހެއްގައި ބޭއްވުމަށް ރައްޔިތުންގެ ހިޔާލު ހޯދުމުގެ ވޯޓެއް އޭޕްރީލް މަހުގެ ހަތަރު ވަނަ ދުވަހު އޮންނަ ކައުންސިލް އިންތިހާބާ އެކު ނެގުމަށް ދަނީ ތައްޔާރުވަމުން ނެވެ. މި ވޯޓުގައި ކޮންގްރެސް ޕާޓީގެ ސްޓޭންޑަކީ "އާނއެކޭ" ބުނުން ކަން އެ ޕާޓީން ވަނީ އިއުލާނު ކޮށްފަ އެވެ.
