އިސްލާމްދީނަށް ފުރައްސާރަ ކުރަމުންދާ މީހަކު ފުލުހަށް ހާޒިރުވާން އަންގައިފި އެވެ.

ނ.ކުޑަފަރި، ހިޔަލީގެ ޙުސައިން ޔޫސުފް (44އ) އަކީ ޓިކްޓޮކްގައި އިސްލާމްދީނަށް ތަކުރާރުކޮށް ފުރައްސާރަ ކުރަމުންދާ މީހެކެވެ. އޭނާ ގެންދަނީ ވަޙީ އާއި ކީރިތި ޤުރުޢާނަށް ވެސް ހަޖޫޖަހާ ވާހަކަ ދައްކަމުންނެވެ.

ދިވެހި ފުލުހުންގެ ޚިދުމަތުން ބުނީ އިސްލާމްދީނަށް ތައުހީނުކޮށް ފުރައްސާރަކުރުމާއި، ދިވެހި ރައްޔިތުންގެ އެއްބައިވަންތަކަން ނަގާލަން މަސައްކަތްކުރުމާއި، މީހުންގެ މެދުގައި ދީނީ ގޮތުން ބައިބައިވުން އުފެދޭ ބާވަތުގެ ވާހަަކައާއި އިސްލާމްދީނުގެ އަސްލުތަކާ ގުޅޭ ގޮތުން ދޮގު މަޢުލޫމާތު، ސޯސަލް މީޑިއާގެ ޕްލެޓްފޯމް ޓިކްޓޮކް މެދުވެރިކޮށް ފެތުރިކަމަށް ތުހުމަތު ކުރެވޭ މައްސަލައެއްގެ ތަހުގީގަށް ކި މީހާ ހާޒިރުކުރަން ބޭނުންވެ، އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދުކުރެވިފައި ނުވާ ކަމަށެވެ.

އެހެން ކަމުން ޖިނާއި މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގައިވާ ގޮތުގެމަތިން ތަހުގީގަށް ހާޒިރުވުމަށް އަންގައި އިއުލާނުކުރާ ކަމަށެވެ.

މި މީހާ އަކީ ރާއްޖެއިން ބޭރުގައި ދިރިއުޅެމުންދާ މީހަކެވެ.