އެމެރިކާއިން ތެހެރާނާ ދެކޮޅަށްް ހަމަލާ ދޭން ފެށީ އިސްރާއީލުން އީރާނަށް ހަމަލާ ދިނުމަށް ނިންމުމާ ގުޅިގެން އެ ގައުމުގެ ރޭވުންތަކާ އެއްގޮތަށްކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެއެވެ. 

ރޫބިއޯ ހޯމަދުވަހު ނޫސްވެރިންނާ ބައްދަލުކުރައްވައި ދެއްކެވި ވާހަކަފުޅުގައި ވިދާޅުވީ އިސްްރާއީލުން އީރާނަށް ހަމަލާދޭން ރާވަމުންދާކަން އެމެރިކާއަށް ދުރާލައި އެނގިފައިވާ ކަމަށެވެ. އަދި އެފަދަ ހަމަލާއެއްގެ ރައްދުގައި އީރާނުން މެދުއިރުމަތީގައި ހުރި އެމެރިކާގެ އެސެޓުތަކާއި މަސްލަހަަތުތަކަށް ހަމަލާދޭނެކަން ޔަގީންކުރެވޭތީ ކުރިއާލައި އީރާނަށް ހަމަލާދިނުމަށް އެމެރިކާއިން އިސްނެގީކަމަށްވެސް ރޫބިއޯ ވިދާޅުވިއެވެ. 

ރޫބިއޯ މިފަދައިން ވިދާޅުވިއިރު މި ހަނގުރާމާގަައި މަރުވި އެމެރިކާ ސިފައިންގެ އަދަދު މިހާރުވަނީ ހަ މީހުންނަށް އަރާފައެވެ. އެއިން ދެ މީހުންނަކީ މެދުއިރުމަތީގައި ހުރި އެމެރިކާގެ އަސްކަރީ މަރުކަޒަކަށް އީރާނުން ދިން ހަމަލާއެއްގައި އިއްޔެ މަރުވި ދެ މީހުންނެވެ. 

އެމެރިކާއާއި އިސްރާއީލުން އީރާނުގެ އެންމެ މަތީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމާ ގުޅިގެން އީރާނުންވަނީ މެދުއިރުމަތީގައި ހުރި އެމެރިކާގެ ބޭސްތަކާއި އެ ބޭސްތައް ގާއިމުކޮށްފައި ހުރި ގައުމުތަކަށް ވަރުގަދަ އަސްކަރީ ހަމަލާތަކެއް ދޭން ފަށާފައެވެ. 

އެމެރިކާއިން އީރާނަށް ހަމަލާދިނީ އިސްރާއީލުން އީރާނަށް ދޭން ނިންމާފައިވާ ހަމަލާތަކުގެ ރައްދުގައި އެގައުމުން އެމެރިކާގެ ބޭސްތަކާއި އެސެޓުތަކަށް ހަމަލާދީފާނެތީ އެކަމުން ސަލާމަތްވުމަށް ކަމުގައި ރޫބިއޯ ވިދާޅުވިއިރު، މީގެ ކުރިން އިސްރާއީލުން ތެހެރާނަށް ހަމަލާދިނުމުން ރައްދުގައި އެމެރިކާގެ ބޭސްތަކަށް އީރާނުން ހަމަލާދީފައި ނެތްކަން ފާހަގަކުރެވެއެވެ. 

އިސްރާއީލަކީ އެމެރިކާގެ އެންމެ މުހިއްމު ބައިވެރިޔާކަމަށް އެ ގައުމުން ބުނާއިރު 2023 ވަނަ އަހރުން ފެށިގެން މިހާތަނަށް އަސްކަރީ އެހީގެ ގޮތުގައި އިސްރާއީލަށް އެމެރިކާއިން 21 ބިލިއަން ޑޮލަރު ދީފައިވެއެވެ. 

"ވަގުތުން ކުރިމަތިވާނެ ނުރައްކަލެއް ޔަގީނުންވެސް އޮތް. އެއީ އިސްރާއީލަށް ހަމަލާދޭނެކަން އަހަރުމެންނަށް ޔަގީންވާއިރު، އެފަދަ ހަމަލާއެއް އީރާނަށް އަމާޒުވެއްޖެނަމަ އެ ގައުމުން އަހަރުމެންނަށް ހަމަލާދޭނެކަން ޔަގީންވާތީ،" ރޫބިއޯ ވިދާޅުވިއެވެ. 

ރޫބިއޯގެ ވާހަކަފުޅުން ޔަގީންވީ އެމެރިކާ އީރާނާ ދެކޮޅަށް ހަނގުރާމައަށް ނެރުމުގައި އިސްރާއީލުގެ ދަައުރުގެ ބޮޑު ކަމެވެ. އީރާނާ ދެކޮޅަށް އެމެރިކާއާ ގުޅިގެން ހަނގުރާމަ ފެށުމަކީ ފާއިތުވި އެތައް އަހަރު އެކަމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އުންމީދުކުރެއްވި ކަމެކެވެ.