ސަރުކާރު ނީސްތާއްޓަށް އަރުވާލައިފި ނަމަ ގެއްލުންވާނީ ރާއްޖޭގެ އިގްތިސާދަށް ކަމަށް ސިޓީތަކާއި އިދާރީ ދާއިރާތައް ހިންގުމާއި އާއްމު މަސައްކަތްތަކާ ބެހޭ ވުޒާރާގެ ސްޓޭޓް މިނިސްޓަރު އަލްއުސްތާޒު މޫސާ ފަތުހީ އާދަމް ވިދާޅުވެއްޖެ އެވެ.

ކޮންގްރެސް ޕާޓީން ރާއްޖޭގެ މީޑިޔާތަކުގެ ޒަރީއާއިން ކުރިއަށްގެންދާ ކެމްޕެއިން ޕްރޮގުރާމު "ދިވެހީންގެ ރާއްޖެ" ޕްރޮގުރާމުގައި ބައިވެރިވެވަޑައިގެން ފަތުހީ ވިދާޅުވީ އިދިކޮޅު ފަރާތްތަކުން ތިބީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ޒައާމަތުގެ ކުރީކޮޅު ރާއްޖެ ބަނގުރޫޓުވެ، އަވަށްޓެރި ލަންކާއަށް ޖެހުނު ހާލު ޖެހޭނެ ކަމަށް ބަލައިގެން ކަމަށެވެ. 

އޭރުގެ އިގްތިސާދީ އަނދަވަޅުން ސަލާމަތްވެ، ގައުމު ކުރިއަށް ހިނގައިގަތުމާއެކު މި އިންތިހާބާ ދިމާކޮށް އިދިކޮޅު ފަރާތްތަކުގެ ސިޔާސީ ޕޯޑިއަމްތަކުގައި ދައްކަމުން އަންނަ ވާހަކަ އަކީ އެ ބޭފުޅުން ބޭނުންވަނީ "ކޮންމެ ދުވަހަކު ސަރުކާރު ނީސްތާއްޓަށް އަރުވާލާނެ މޭޔަރެއް" ކަމަށް ބުނާ ވާހަކަތައް ކަމަށް ފަތުހީ ވިދާޅުވި އެވެ. 

މީގެ އިތުރަށް އެމްޑީޕީގެ ސަރުކާރުގައި ކަނޑުފަޅުން ރައްޔިތުންނަށް ދޫކުރު ގޯތިތައް ހިއްކާ ރައްޔިތުންނަށް ދޫކުރަމުން ދަނީ މި ސަރުކާރުންކަމަށާއި، ބޯހިޔާވަހިކަމުގެ ބިޔަ ބޮޑެތި ޕްރޮޖެކްޓުތައް މުޅި ރާއްޖޭގެ އެކި ކަންކޮޅުތަކުގައި ކުރިއަށްދާއިރު މިކަހަލަ އެއްވެސް މަޝްރޫއެއް އެމްޑީޕީގެ ދެ ވެރިކަމުގައި ވެސް ފެނިފައި ނުވާކަމަށް ފަތުހީ ވިދާޅުވި އެވެ.

ފަތުހީ ވިދާޅުވީ ރާއްޖޭގައި ހުރި ބައެއް އިމާރާތްތައް ރަހުނުކޮށް އެމްޑީޕީގެ ސަރުކާރުން ލޯނު ނަގާފައިވާއިރު އެ ފައިސާއިން ރައްޔިތުންނަށް ކޮށްދިން ކަމެއް ވެސް ނެތް ކަމަށެވެ. 

މި ޒައާމަތުގައި ތަރައްގީގެ ބޮޑޭތި މަޝްރޫއުތަކެއް ކުރިއަށް ދާއިރު އެމްޑީޕީން އެކަންކަމަށް ހުރަސް އަޅައިގެން ނުވާނެކަމަށް ފަތުހީ ވިދާޅުވި އެވެ. 

ވާހަކަފުޅު ނިންމަވާލައްވަމުން ފަތުހީ ވިދާޅުވީ އިންތިހާބީ އުކުޅެއްގެ ގޮތުގައި ގައުމު ހަލަބޮލިކޮށް ތަރައްގީއަށް ހުރަސް އެޅުމަކީ މިއަދު ރައްޔިތުން ގަބޫލުކުރާނެ ކަމެއް ނޫން ކަމަށެވެ.