ވަގުތީގޮތުން ފަލަސްތީނުގެ ޣައްޒާގައި ވެރިކަން ހިންގާނެ ސުލްހައިގެ ބޯޑަށް އެމެރިކާގެ ޚާރިޖީ ވަޒީރު މާކޯ ރޫބިޔޯ، އިނގިރޭސިވިލާތުގެ ކުރީގެ ބޮޑުވަޒީރު ޓޯނީ ބްލެޔަރ އަދި ޓްރަމްޕްގެ ދަނބިދަރިފުޅު ޖެރެޑް ކުޝްނަރ އައްޔަނުކުރައްވަން އެމެރިކާގެ ރައީސް ޑޮނަލްޑް ޓްރަމްޕް ނިންމަވައިފިއެވެ.

ޣައްޒާގައި ވެރިކަން ކުރަމުން އަންނަ ހަމާސް ޖަމާއަތާއި އިސްރާއީލާއި ދެމެދު 2023 ވަނަ އަހަރުގެ އޮކްޓޯބަރުމަހުގެ 10 ވަނަ ދުވަހު ފެށުނު ހަމަލާތައް ވަނީ މެދު ކަނޑާލާފައެވެ. ހަނގުރާމަ މެދުކަނޑާލުމަށް ވެފައިވާ އެއްބަސްވުމުގެ ދެ ވަނަ ފިޔަވަހީގެ ދަށުން ހަމާސްގެ ވެރިކަން ނިމުމަކަށް ގެނެސް، ޣައްޒާގައި ވެރިކަން ކުރާ އިންތިގާލީ ކޮމިޓީއެއް އެކުލަވާލަންޖެހެއެވެ.

އެމެރިކާގެ ރައީސް ޓްރަމްޕް އިސްވެ އުފައްދަވާފައިވާ މި ބޯޑުގެ ރިޔާސަތު ބަލަހައްޓަވަނީ ވެސް އެމަނިކުފާނެވެ. 

ޓްރަމްޕްގެ އިތުރުން ދެން ބޯޑުގައި ހިމެނިވަޑައިގަންނަވާނީ އެމެރިކާގެ ޚާރިޖީ ވަޒީރު މާކޯ ރޫބިޔޯ، އިނގިރޭސިވިލާތުގެ ކުރީގެ ބޮޑުވަޒީރު ޓޯނީ ބްލެޔަރ އަދި ޓްރަމްޕްގެ ދަނބިދަރިފުޅު ޖެރެޑް ކުޝްނަރގެ އިތުރުން ޓްރަމްޕްގެ ހާއްސަ މަންދޫބު ސްޓީވް ވިޓްކޯފް އެވެ. މީގެ އިތުރުން އެޕޯލޯ ގްލޯބަލް މެނޭޖްމަންޓްގެ ސީއީއޯ މާކް ރޯވަން، ވޯލްޑް ބޭންކްގެ ރައީސް އަޖޭ ބަންގާ އަދި އެމެރިކާގެ ޑެޕިއުޓީ ނޭޝަނަލް ސެކިއުރިޓީ އެޑްވައިޒަރު ރޮބަޓް ގޭބްރިއަލް ވެސް މި ބޯޑުގައި ހިމެނެއެވެ.

ބޯޑަށް އައްޔަނުކުރާ އިތުރު ބޭފުޅުންގެ ނަންތައް ވަރަށް އަވަހަށް ހާމަކުރާނެކަމަށް ވައިޓް ހައުސްއިން ވަނީ ބުނެފައެވެ.

މިހާތަނަށް ބޯޑަށް އައްޔަނުކުރެވިގެން ދިޔަ ބޭފުޅުންގެ ތެރޭގައި ފަލަސްތީނަށް ނިސްބަތްވާ އެއްވެސް ބޭފުޅަކު ހިމެނިފައެއް ނުވެއެވެ. 

ޓޯނީ ބްލެއަރ މި ބޯޑުގައި ހިމެނުމުން ގިނަ ބައެއްގެ ފާޑުކިޔުންތައް އަމާޒުވަމުންދާއިރު ބްލެއަރ އަކީ 2003 ވަނަ އަހަރު އެމެރިކާއިން އިރާގަށް ދިން ހަމަލައަށް ތާއީދުކުރުމުގެ ސަބަބުން މެދުއިރުމަތީގައި މަގުބޫލުކަން ކުޑަވެފައިވާ ބޭފުޅެކެވެ. ޖެރާޑް ކުޝްނަރއަކީ ވެސް އިސްރާއީލަށް ވަރަށް ބޮޑަށް ތާއީދުކުރާ އަދި ފަލަސްތީނުގެ ރައްޔިތުންނަކީ އަމިއްލަ ވެރިކަމެއް ކުރަން ނޭނގޭ ބައެއްކަމަށް ބުނެ ވާހަކަ ދައްކާފައިވާ މީހެކެވެ. 

އެމެރިކާގެ މި ރޭވުމާ މެދު ފަލަސްތީނުގެ ރައްޔިތުން ދަނީ ސުވާލު އުފައްދަމުންނެވެ. ސަބަބަކީ އެމެރިކާއިން  މެދުވެރިއެއްގެ ރޯލު އަދާކޮސް މީގެ ކުރިން އެކުލަވާލި ހަމަލާބަދަލުކުރުން ހުއްޓާލުމުގެ އެއްބަސްވުމާ ހިލާފަށް މިހާރުވެސް ޔަހޫދީން އަންނަނީ ޣައްޒާއަށް ހަމަލާތައް ދެމުންކަމަށް ވާތީއެވެ.

މި އެއްބަސްވުމުގެ ދެވަނަ ފިޔަވަހީގެ ދަށުން ޣައްޒާއިން ޔަހޫދީ ސިފައިން އެއްކޮށް ފައިބަން ޖެޖޭނެއެވެ. އަދި ރަފަހު ބޯޑަރު ހުޅުވާލުމާއި، ޣައްޒާގެ ރަށްބޭރުގައި ފުނިޖެހިފައިވާ އެހީގެ ގާފިލާތައް ޣައްޒާއަށް ވަނުމަށް ހުރަސް ނޭޅުން ހިމެނެއެވެ. 

ހަނގުރާމަ ފެށުނު ފަހުން މިހާތަނަށް ޔަހޫދީން ވަނީ ޣައްޒާގެ 71،000 އަށްވުރެ ގިނަ މުސްލިމުން ޝަހީދުކޮށްލާފައެވެ. މީގެ ތެރޭގައި ހަމަލާތައް ހުއްޓާލުމަށް އެއްބަސްވީ ފަހުން ޝަހީދުކޮށްލި 451 މީހުން ހިމެނެއެވެ.