ހުރިހާ ފަންތިއެއްގެ ވިޔަފާރިތަކަށް ބޭނުންވާ ހިދުމަތްތަކާއެކު އެސްއެމްއީ ޑިޖިޓަލްގެ މޯބައިލް އެޕްލިކޭޝަން މިއަހަރު ތައާރަފުކުރަން ނިންމައިފިއެވެ.

"އެމްއެމްޓީވީ"ގެ ބޮޑު ހަބަރު ޕްރޮގްރާމުގައި ވާހަކަދައްކަވަމުން، އިންޗާޖް އޮފް މާކެޓިން އެންޑް ކޮމިއުނިކޭޝަންސް މަރްޔަމް ޝަޒްނާ ވިދާޅުވީ މޯބައިލް އެޕްލިކޭޝަން ތައްޔާރުކުރަމުންދަނީ ފައިނޭންސިން ފިޔަވައި އެސްއެމްއީއަކަށް ބޭނުންވާނެ ހުރިހާ މައުލޫމާތެއް އެއްތަނަކުން ލިބޭގޮތަކަށްކަމަށެވެ.

މީގެ އިތުރުން ފައިނޭންޝަލް ފޯކާސްޓުފަދަ ޓެމްޕްލޭޓުތައްވެސް ކަސްޓަމަރުންނަށް ލުއިވާނެގޮތަކަށް ހެދުމުގެ މަސައްކަތްކުރަމުންދާކަމަށާއި އެކަމުގެ ސަބަބުން އެޕްލިކޭޝްން މެދުވެރިކޮށް ބިޒްނަސް ޕްލޭންތައް ހަދާލެވި، ވަގުތު ސަލާމަތްވެގެންދާނެކަމަށް ޝަޒްނާ ވިދާޅުވިއެވެ.

އެސްއެމްއީ ޑިޖިޓަލްއަކީ ރާއްޖޭގެ އިގްތިސާދުގެ އެންމެ މުހިންމު ބައިވެރިން ކަމުގައިވާ ކުދި އަދި މެދު ފަންތީގެ ވިޔަފާރިތަކަށް މާލީ ވާގިވެރިކަން ހޯދުމަށް އޮތް ދަތިތަކަށް ހައްލު ހޯދައިދިނުމުގެ ގޮތުން އުފައްދާފައިވާ ކުންފުންޏެކެވެ.

އެސްއެމްއީ ޑިޖިޓަލް އިން ދަނީ ކުންފުނީގެ ހިންގުމުގެ ނިޒާމު ހަރުދަނާ ކުރުމުގެތެރެއިން، ކުދި އަދި މެދުފަންތީގެ ވިޔަފާރިތަކުގެ ދާއިރާ އިތުރަށް ކުރިއެރުވުމަށް ބޭނުންވާ ޑިޖިޓަލް އީޖާދީ ހައްލުތަކާއި، އިސްލާމިކް ފައިނޭންސްގެ އުސޫލުތަކާ އެއްގޮތަށް ހުރިހާ ފަރާތްތަކަށް ހަމަހަމަ ފުރުސަތުތައް ލިބިދެވޭނެ މާހައުލެއް ގާއިމުކުރަމުންނެވެ.

ވޭތުވެދިޔަ ދެ އަހަރަށް ބަލާއިރު، ކުންފުނިން ވަނީ ތަފާތު އެކި ފައިނޭންސިން ސްކީމްތައް ތައާރަފްކޮށް، އިޤްތިސާދުގައި ހަރަކާތްތެރިވާ ގިނަ އަދަދެއްގެ ކުދި ވިޔަފާރިތަކަކަށް ފައިނޭންސިން ފޯރުކޮށްދީފައެވެ.