ދިވެހިރާއްޖޭގެ ކްރެޑިޓް ރޭޓިން ހަދާ އެޖެންސީތަކުގެ ތެރެއިން މޫޑީސްއިން ރާއްޖޭގެ ކްރެޑިޓް ރޭޓިންގެ އައުޓްލުކް ނެގިޓިވްއިން ސްޓޭބަލްއަށް ބަދަލުކުރުމަކީ އަމިއްލަ ވިޔަފާރިތަކަށް ލިބުނު ވަރަށް ބޮޑު ހިތްހަމަޖެހުމެއް ކަމަށް އިގުތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ. 

ކުދި އަދި މެދުފަންތީގެ ވިޔަފާރިތަކުގެ ހިދުމަތުގެ އަގުވަޒަންކުރުމުގެ ގޮތުން ރޭ ކުރިއަށްގެންދިޔަ "މޯލްޑިވްސް އެސްއެމްއީ އެވޯޑް 2025" ހަފުލާ ޝަރަފުވެރިކޮށްދެއްވައި ދެއްކެވި ވާހަކަފުޅުގައި ސައީދު ވިދާޅުވީ ކުދި އަދި މެދުފަންތީގެ ވިޔަފާރިތައް ކުރިއެރުވުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށެވެ. 

އެގޮތުން ކުދި ވިޔަފާރިތައް އިތުރަށް ތަރައްގީކުރުމަށް ބޭނުންވާ ތަމްރީނާއި ހުނަރު ފޯރުކޮށްދިނުމުގެ ގޮތުން 141 ތަމްރީނު ޕްރޮގުރާމު ކުރިއަށްގެންގޮސް، 2،500 ފަރާތަކަށް ބޭުންވާ ތަމްރީނާއި އިރުޝާދު ފޯރުކޮށްދީފައިވާކަން ސައީދު ފާހަގަކުރެއްވިއެވެ. 

އޭގެ އިތުރަށް މި އަހަރު ތެރޭގައި ކުދި އަދި މެދުފަންތީގެ ވިޔަފާރިތަކަށް ހާއްސަކޮށްގެން ބޮޑު އެކްސްޕޯއެއް ބާއްވާފައިވާކަމަށާއި، އެއީ މިހާތަނަށް ރާއްޖޭގައި ބޭއްވި އެންމެ ބޮޑު އަދި އެންމެ ފުރިހަމަ އެކްސްޕޯކަން ސައީދު ފާހަގަކުރެއްވިއެވެ. 

އޭގެ އިތުރަށް ރައީސްގެ ވައުދުފުޅާ އެއްގޮތަށް ޕޭޕަލްގެ ހިދުމަތް ރާއްޖެއަށް ގެނައުމަށް އޫރީދޫއާއެކު ކުރަމުންދާ މަސައްކަަތްތަކުގެ ތެރެއިން އަންނަ އަހަރުގެ ކުރީ ކޮޅުގައި ޕޭޕަލް ހިދުމަތް ރާއްޖެއިން ލިބޭނެ ކަމުގައެވެ. އޭގެ އިތުރަށް ބީއެމްއެލްއިން "ސްވައިޕް"ގެ ނަމުގައި އީ ވޮލެޓެއް ތައާރަފުކޮށްފައިވާކަން ސައީދު ފާހަގަކުރެއްވިއެވެ. 

ރާއްޖޭގެ އިގުތިސާދު ރައީސުލްޖުމްހޫރިއްޔާ ޑރ.މުޙައްމަަދު މުޢިއްޒު ރާއްޖޭގެ ވެރިކަމާ ހަވާލުވެވަޑައިގެންނެވިއިރު އޮތް ހާލަތު ސިފަކުރައްވައި މިނިސްޓަރު ވިދާޅުވީ އެއިރު ދިވެހި ވިޔަފާރިވެރިން ތިބީ މާޔޫސްވެފައި ކަމަށާއި، ސްކޫލުތަކާއި ހޮސްޕިޓާތައް މޯގޭޖުކޮށް ބޮޑެތި އަދަދުތަކުން ދަރަނި ނެގުމުގެ ސަބަބުން ރާއްޖޭގެ ކްރެޑިޓް ރޭޓިން އިންތިހާއަށް ދަށްވެ، ރޭޓިން އިތުރަށް ދަށްވާނެ ކަމުގައި ބެލެވޭ ހާލަތު ވުޖޫދުވެފައި އޮތްކަމަށް މިނިސްޓަރު ވިދާޅުވިއެވެ. 

ނަމަވެސް ފާއިތުވި ދެ އަހަރެއްހައި ދުވަހުގެ ތެރޭގައި ކުރެވުނު މަސައްކަތުގެ ނަތީޖާއެއްގެ ގޮތުން މިހާރު މޫޑީސްއިން ރާއްޖޭގެ ކްރެޑިޓް ރޭޓިންގެ އައުޓްލުކް ނެގެޓިވްއިން ސްޓޭބަލްއަށް ބަދަލުކޮށްފައިވާކަމަށާއި، އެއީ ރާއްޖޭގެ ކުދި އަދި މެދުފަންތީގެ ވިޔަފާރިތައް ހިމެނޭހެން ޖުމްލަކޮށް ދިވެހި ހުރިހާ ވިޔަފާރިއަކަށް ލިބޭ ހިތްހަމަޖެހުމެއް ކަމުގައި ސައީދު ވިދާޅުވިއެވެ. 

" މޫޑީސްއިން ރާއްޖޭގެ އައުޓްލުކް ސްޓޭބަލް ކަމަށް ވަނީ ކަނޑައަޅާފައި. މިއީ، ކުދި ވިޔަފާރިތަކާއި ޖުމްލަކޮށް ހުރިހާ ވިޔަފާރިތަކަށް ލިބޭ ބޮޑު ހިތްހަމަޖެހުމެއް އަދި ލިބޭ ޔަޤީން ކަމެއް. ވިޔަފާރިތަކަށް ބޭނުންވަނީ، މި ޔަޤީންކަން. އިޤްތިޞާދު އޮތް ޑިޕްރެޝަނުން ސްޓެބިލިޓީއަކަށް އައިކަން އެ އިޢުލާނުކުރީ،" ސައީދު ވިދާޅުވިއެވެ. 

އަދި މި ސަރުކާރުން ކުރަމުންދާ މަސައްކަތުގެ ތެރެއިން ވިޔަފާރިތައް ރެގިއުލޭޓުކުރުމުގެ އޮނިގަނޑު ހަރުދަނާކުރުމުގެ މަސައްކަތުގެ މުހިއްމުކަން ފާހަގަކުރައްވަމުން ސައީދު ވިދާޅުވީ ކުރިން އެ ދާއިރާގައި އޮތީ އެންމެ ގާނޫނެއް ނަމަވެސް މިހާރު އެ ދާއިރާއަށް ބޭނުންވާ ގިނަ ގާނޫނުތަކެއް ވުޖޫދުކުރެވިފައިވާ ކަމަަށެވެ.