ރާއްޖޭގައި ބިދޭސީން ޤަވާއިދާ ޚިލާފަށް ހިންގާ ވިޔަފާރިތައް ރިޕޯޓްކުރުމަށް ސަރުކާރުން އިޢުލާނުކުރިތާ 41 ގަޑިއިރުތެރޭ، 29 ވިޔަފާރިއެއްގެ ރިޕޯޓް ޢާއްމު ފަރާތްތަކުން ކޮށްފައިވާކަމަށް، އިޤުތިޞާދީ ތަރައްޤީއާއި ވިޔަފާރިއާ ބެހޭ ވުޒާރާގެ ވަޒީރު މުޙައްމަދު ސަޢީދު ވިދާޅުވެއްޖެއެވެ. 

ވަޒީރު މިފަދައިން ވިދާޅުވީ، އެފަދަ މައްސަލަތައް ރިޕޯޓްކުރުމަށް ނޮވެމްބަރު 27 ވަނަ ދުވަހު ހުޅުވާލުމަށްފަހު، މިހާތަނަށް ރިޕޯޓްވީ އަދަދު ހާމަކުރެއްވުމަށް މީސްމީޑިއާގައި ކުރެއްވި ޕޯސްޓެއްގައެވެ. 

ރިޕޯޓްކުރާ މައްސަލަތަކަށް ބަލައި، މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީއާއި މި މިނިސްޓްރީ އަދި މޯލްޑިވްސް ޕޮލިސް ސަރވިސް، މޯލްޑިވްސް އިމިގްރޭޝަންގެ އިތުރުން، ސަރުކާރުގެ ތަންފީޒީ އިދާރާތައް ހިމެނޭ ގޮތަށް ގާއިމްކޮށްފައިވާ "ނެޝަނަލް ޓާސްކްފޯރސް އޮން ކޮމްބެޓިން އިލީގަލް އެކްސްޕެޓްރިއޭޓް އޮޕަރޭޝަންސް އެންޑް ބިޒްނަސަސް" މެދުވެރިކޮށް، އަވަސް ފިޔަވަޅު އަޅާނެކަމުގެ ޔަގީންކަން އިޤްތިޞާދީ ވުޒާރާއިން މީގެކުރިން ވަނީ ދީފައެވެ. 

ވަޒީރު މިއަދު ވިދާޅުވީ، ޓާސްކްފޯސްގެ އޮޕަރޭޝަންތައް މިއަދު މެންދުރު ފަހުން ފެށިގެން ކުރިއަށްގެންދާނެ ކަމަށެވެ. 

ވަޒީރު ވަނީ މިކަމުގައި ރައްޔިތުން ދެއްވާ އެއްބާރުލެއްްވުމަށް ޝުކުރުއަދާކުރައްވާފައެވެ. 

އިޤުތިޞާދީ ވުޒާރާއިން ބުނީ ބިދޭސީން ޤަވާއިދާ ޚިލާފަށް ހަރަކާތްތެރިވަނީ، ނިވާފަތްގަނޑަކަށް ދިވެހިން ހަދައިގެން ބިދޭސީން ހިންގާ ވިޔަފާރިތަކާއި، ފޮރިން އިންވެސްޓްމަންޓް ޤާނޫނުގެ ދަށުން ބިދޭސީންނަށް ހުއްދަ ނުކުރާ ދާއިރާތަކުގައި ހަރަކާތްތެރިވަމުން އަންނަ ބިދޭސީ ވިޔަފާރިތަކުގައި ކަމަށެވެ. 

ބިދޭސީން ޤަވާޢިދާ ހިލާފަށް ވިޔަފާރިކުރާ ކަމުގެ މަޢުލޫމާތު ހުށަހެޅުމުގައި، ހުށަހަޅާ ފަރާތް ނޭނގޭ ގޮތަށް މަޢުލޫމާތު ފޯރުކޮށްދެވޭނެ އިންތިޒާމް ވެބްސައިޓް މެދުވެރިކޮށް ހަމަޖެހިފައިވާކަމަށް އެ ވުޒާރާއިން ބުނެފައިވެއެވެ.