ރައީސުލްޖުމްޙޫރިއްޔާ ޑރ. މުޙައްމަދު މުޢިއްޒުގެ ސަރުކާރަށާއި ސިޓީސް މިނިސްޓްރީއަށް ދެ އަހަރު ފުރުމާ ގުޅިގެން މުވައްޒަފުންގެ މެދުގައި ފުޓްސަލް އަދި ހޭންޑްބޯލް މުބާރާތެއް މިއަދު ހެނދުނު ފަށައިފިއެވެ.

މި މުބާރާތްތައް ފެށުމުގެ ރަސްމިއްޔާތު ޝަރަފުވެރިކޮށްދެއްވީ ކުރީގެ ޕަބްލިކް ވަރކްސް މިނިސްޓަރ އަލްފާޟިލް ޢަބްދުﷲ ކަމާލުއްދީން އެވެ.

 މި މުބާރާތުގައި  ޖުމްލަ 4 ޓީމަކުން ވާދަކުރެއެވެ. އެއީ ރެޑް، އޮރެންޖު، ޕިންކު އަދި ގްރީނެވެ.

މާލޭ ސިޓީ ކައުންސިލްގެ ފުޓްސަލް ދަނޑުގައި ކުރިއަށްދާ މި ދެ މުބާރާތް ފެއްޓުމުގެ ގޮތުން ކުޅުނު މެޗު ކާމިޔާބުކޮށް، މެޗުގެ މޭން އޮފް ދަ މެޗުގެ މަޤާމު ޙާއްޞިލްކުރެއްވީ މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސް އާދަމް ޝަރީފު ޢުމަރެވެ.  މި މެޗުގައި ބައްދަލުކުރީ މިނިސްޓަރގެ ޓީމާއި ސްޓޭޓް މިނިސްޓަރ މުޙައްމަދު އިބުރާހީމްގެ ޓީމެވެ. މި މެޗު 3 ލަނޑު 0 ލަނޑުން ކާމިޔާބުކުރެއްވީ މިނިސްޓަރ އާދަމް ޝަރީފްގެ ޓީމެވެ.

މި މެޗަށް ފަހު މުބާރާތުގެ އެހެން މެޗުތަކުގެ ކުޅުން ވަނީ ފެށިފައެވެ. ފުޓްސަލް ފުރަތަމަ މެޗުގައި ގްރީނާއި ޕިންކު ބައްދަލުކޮށް 3 ލަނޑު 1 ލަނޑުން އެ މެޗު ކާމިޔާބުކުރީ ގުރީނެވެ. މެޗުގެ މޮޅު ކުޅުންތެރިއަކީ ގްރީންގެ 10 ނަންބަރު ޖަޒުލާނެވެ. އަދި މި މުބާރާތްތައް ނިމިގެންދާނީ މިރޭގެ ވަގުތެއްގައެވެ.

މި ރަސްމިއްޔާތުގައި ވާހަކަފުޅުދައްކަވަމުން ކުޅިވަރުގެ ތެރެއިން މުޖުތަމަޢުގައި ނެތެމުންދާ ގުޅުންތެރިކަން ބަދަހިކުރުމަށް ޢަބްދުﷲ ކަމާލުއްދީން ވަނީ އިލްތިމާސްކުރައްވާފައެވެ.