ENGLISH

29 ނޮވެމްބަރު 2025

Advertisement

ލަންކާގެ މޫސުމީ ކާރިސާއާ ގުޅިގެން ދިވެހިން ސަމާލުވާން އެދިއްޖެ

29 ނޮވެމްބަރު 2025

|

ޢަލީ ޝަހީމް

ލަންކާއަށް ކުރަމުންދާ މޫސުމީ ކާރިސާގެ ތެރެއިން. އެ ޤައުމުގައި ދިރިއުޅޭ ދިވެހިން ސަމާލުކަން އެމްބަސީން ވަނީ އިލްތިމާސްކޮށްފަ

މި ފަހުގެ ތާރީޚެއްގައި އަވައްޓެރި ލަންކާއަށް ކުރިމަތިވި އެންމެ ބޮޑު މޫސުމީ ކާރިސާއާ ގުޅިގެން ލަންކާގައި ދިރިއުޅޭ ދިވެހިން ސަމާލުވާން އެގައުމުގައި ހުންނަ ރާއްޖޭގެ އެމްބަސީން އިލްތިމާސްކޮށްފިއެވެ. 

ރާއްޖޭގެ އެމްބަސީން ރޭ ނެރުނު ބަޔާނުގައި ވަނީ ތޫފާން "ދީތުވާ" ގެ ސަބަބުން، ލަންކާގައި އުޅޭ ދިވެހިން ސަމާލުވެ، ރައްކާތެރިކަމުގެ ވިޔަވަޅުތައް އެޅުމަށް އެދިފައެވެ. 

އެމްބަސީގެ ބަޔާނުގައި ބުނީ ވިއްސާރަވެ، ބިންގަނޑު ކަނޑައިގެން ދިއުންފަދަ ހާދިސާތައް ކުރިމަތިވެ ލަންކާ ނުރައްކަލުގައި އޮތުމާއެކު އެޤައުމުން ރެޑް އެލާޓް ނެރެފައިވާ ކަމަށެވެ. އެހެންވެ، ކޮންމެހެން ކުރަންޖެހޭ ދަތުރެއް ނޫނީ ނުކުރުމަށް ދިވެހިންނަށް އެމްބަސީން އިލްތިމާސްކޮށްފައިވެއެވެ. 

ހާދިސާތައް ހިނގާ ސަރަޙައްދުތަކަށް ނުދިއުމަށާއި، ބޯކޮށް ވާރޭވެހޭ ވަގުތުތަކުގައި ބޭރަށް ނުނިކުތުމަށް ދިވެހި އެމްބަސީގެ ބަޔާނުގައި ބުނެފައިވެއެވެ. 

ލަންކާގެ ބައެއް ހިސާބުތަކުގެ ކޯރުތައް ފުރިގެން ބަންޑުންވާކަމަށް ލަފާކޮށްފައިވާތީ، ބިންތިރި ސަރަޙައްދުތަކާއި މޫދާ ކައިރި ސަރަޙައްދުތަކުގައި ދިރިއުޅޭ ދިވެހިން ރައްކާތެރި ސަރަޙައްދުތަކަށް ބަދަލުވާން ވެސް އެމްބަސީން ވަނީ އެދިފައެވެ. 

ލަންކާއިން ވަނީ އެޤައުމަށް ދަތުރުކުރާ މީހުންނަށް އެއްވެސް ގެއްލުމެއް ލިބިއްޖެ ނަމަ ގުޅަން ހޮޓްލައިން ނަންބަރު 1912 ހަމަޖައްސާފައެވެ. އެޤައުމުން ބުނީ ހޮޓްލައިން ނަންބަރުގެ ޚިދުމަތް 24 ގަޑިއިރު ލިބޭނެ ކަމަށެވެ. 

އެންމެ ފަހުގެ ރިޕޯޓުތައް ބުނާގޮތުން ލަންކާއަށް ދިމާވެފައިވާ މޫސުމީ ކާރިސާގައި 69 މީހުން މަރުވެ 34 މީހަކު ވަނީ ގެއްލިފައެވެ. 

ލަންކާއިން ބައިނަލްއަޤްވާމީ އެހީއަށް އެދިފައިވާއިރު، އިންޑިއާއިން ވަނީ އެހީ ހިފައިގެން މިހާރު ލަންކާއަށް އެތެރެވެފައެވެ. އެޤައުމުގެ އެހީ ހާލުގައި ޖެހިފައިވާ މީހުންނަށް ފޯރުކޮށްދޭނެއެވެ. 

އަވައްޓެރި ލަންކާއަށް އެހީވާން ރާއްޖެއިން ވެސް ވަނީ 50،000 ޑޮލަރާއި 25،000 މަސްދަޅު ދިނުމަށް ނިންމައިފައެވެ. 

ކިޔުންތެރިންގެ ހިޔާލު