ENGLISH
29 ނޮވެމްބަރު 2025
ކައުންސިލްތަކުގެ އަޒުމަކަށްވާންވީ ނިޒާމު ރަނގަޅުކުރަން މަސައްކަތްކުރުން: އާދަމް ޝަރީފް
29 ނޮވެމްބަރު 2025
|
ތުލުސްދޫގައި ކުރިއަށްދާ ކާފު ފޯރަމް
ހުރިހާ ކައުންސިލެއްގެ ވެސް އަޒުމަކަށްވާންވީ ނިޒާމު ރަނގަޅުކުރުމަށްޓަކައި މަސައްކަތް ކުރުންކަމަށް މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސް އާދަމް ޝަރީފު ޢުމަރު ވިދާޅުވެއްޖެއެވެ.
މިފަދައިން ވަޒީރު ވިދާޅުވީ މާލެ އަތޮޅު ކައުންސިލްގެ އިދާރާއިން އެ އަތޮޅުގެ ހުރިހާ ކައުންސިލްތަކަށް ޚާއްޞަކޮށްގެން ކުރިއަށްގެންދާ "ކާފު ފޯރަމް" އިފްތިތާހްކޮށް، އެ ރަސްމިއްޔާތު ޝަރަފުވެރިކޮށްދެއްވާ ވާހަކަފުޅުދައްކަވަމުންނެވެ.
ކ. ތުލުސްދޫގައި 4 ދުވަހުގެ މުއްދަތަކަށް ކުރިޔަށްދާ މި ފޯރަމް ފައްޓަވައިދެއްވައި، ކައުންސިލުން އިސްނަގައިގެން މުޅި ކ. އަތޮޅަށް އަމާޒުކޮށްގެން މިފަދަ ފޯރަމެއް ކުރިއަށްގެންދާތީ ވަޒީރުގެ ވާހަކަފުޅުގައި ޝުކުރުއަދާކުރެއްވިއެވެ. އަދި އަތޮޅުގެ ކަންކަން ކުރިޔަށް ގެންދިޔުމަށްޓަކައި ގިނަ ބަޔަކު އެއް މޭޒު ދޮށުގައި ތިއްބަވައިގެން މަޝްވަރާކުރެއްވުމުގެ މުހިންމުކަމާއި މި ފޯރަމްގެ ބޭނުންތެރިކަމަށް ވަޒީރު ވަނީ އަލިއަޅުއްވާލައްވާފައެވެ.
ލޯކަލް ގަވަރމަންޓް އޮތޯރިޓީ (އެލްޖީއޭ) ގެ މަސައްކަތުން ލާމަރުކަޒީ ނިޒާމު ކުރިއަރަމުންދިޔަ ނަމަވެސް، މި ނިޒާމު އިތުރަށް ތަރައްޤީކުރަން ގިނަ މަސައްކަތްތަކެއް ކުރަންޖެހޭކަން ވަޒީރު ފާހަގަކުރެއްވިއެވެ.
"ފެހި ޤާނޫނު އަސާސީން އަޅުގަނޑުމެންނަށް ދިން އެންމެ ބޮޑު އަސާސަކީ ޤާނޫނު އަސާސީން ލާމަރުކަޒީ ނިޒާމު ކަށަވަރުކޮށް ދިނުން. ރައްޔިތުންނަށް ލިބެންޖެހޭ ބާރުވެރިކަން އެންމެ ފުރިހަމަ މާނާގައި ކަށަވަރުކޮށްދިނުން" - ވަޒީރު އާދަމް ޝަރީފް އުމަރު
ކައުންސިލްތަކާ އެކު ރަނގަޅު ގުޅުމެއް ބޭއްވިގެން މިނިސްޓްރީއަށް މަސައްކަތްތަކެއް ކުރެވެމުންދާތީ އެކަމާ ގުޅިގެން އުފާ ފާޅުކޮށް، "ކާފު ފޯރަމް" މެދުވެރިކޮށް މުހިންމު ކަންތައްތަކެއްގެ މަޝްވަރާ ކުރެވިގެންދާނެ ކަމަށް ވަޒީރު ވަނީ ވިދާޅުވެފައެވެ. މީގެއިތުރުން މިނިސްޓަރ ވަނީ ރޭ ކުރިޔަށްދިޔަ ޕެނަލް ޑިސްކަޝަންގައި ބައިވެރިވެވަޑައިގެން، ކައުންސިލުތަކުން ކުރެއްވި ބައެއް ސުވާލުތަކަށް ވަޒީރު ވަނީ ޖަވާބުދެއްވާފައެވެ.
މި ފޯރަމްގައި ބައިވެރިވެވަޑައިގަންނަވާ ކޮންމެ މުއައްސަސާއަކުން ވެސް ވަކި ވަކި ސެޝަންތައް ބޭއްވުމުގެ އިތުރަށް ކައުންސިލްތަކާއެކު ޑިސްކަޝަން ސެޝަންތައް ކުރިއަށްގެންގޮސް، އެކި ހުށަހެޅުންތައް ހުށަހެޅުމަށް ވަނީ ރޭވިފައެވެ.
"ކާފު ފޯރަމް" ގައި މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރއާއި، މިނިސްޓްރީ އޮފް ހެލްތުގެ އިތުރުން ބިޒްނަސް ސެންޓަރ ކޯޕަރޭޝަންގެ ބޭފުޅުން ބައިވެރިވެވަޑައިގަންނަވައެވެ.