މޯލްޑިވްސް އެމްއެސްއެމްއީ އެވޯޑްސްގައި ދެ ގިންތިއަކުން 22 ވިޔަފާރިއަކަށް އެވޯޑް ޙަވާލުކޮށްފިއެވެ. 

އެވޯޑް ޙަވާލުކުރުމުގެ ރަސްމިއްޔާތު އޮތީ ރޭ ސޯޝަލް ސެންޓަރުގައެވެ.

އެމްއެސްއެމްއީ އެވޯޑަކީ ދިވެހިރާއްޖޭގައި ހަރަކާތްތެރިވާ އެންމެ ކުދި، ކުދި އަދި މެދުފަންތީގެ ވިޔަފާރިތައް ހޯދަމުންދާ ކާމިޔާބީތައް ފާހަގަކޮށް، އެ ވިޔަފާރިތަކަށް ހިތްވަރު ދިނުމުގެ ގޮތުން، އިޤުތިޞާދީ ތަރައްޤީއާއި ވިޔަފާރިއާބެހޭ ވުޒާރާގެ އިސްނެންގެވުމާއެކު ބިޒްނަސް ސެންޓަރ ކޯޕަރޭޝަން (ބީ.ސީ.ސީ) އިން ދޭ އެވޯޑެކެވެ. 

އެވޯޑް ދީފައިވާ ދެ ގިންތިއަކީ، ފަނޑިޔާރުން ހޮއްވަވާފައިވާ ވިޔަފާރިތަކުގެ ގިންތިއާއި، ޢާންމުން ވޯޓުލައިގެން ހޮވާފައިވާ މަޤުބޫލު ވިޔަފާރިތަކުގެ ގިންތިއެވެ.

ރޭގެ އެވޯޑް ޙަފްލާގައި، ފަނޑިޔާރުންގެ މާކުހުން އެންމެ ކުރި ހޯދި 11 ވިޔަފާރިއަކަށާއި، ޢާއްމުންގެ ވޯޓު އެންމެ ގިނައިން ލިބިގެން 11 ވިޔަފާރިއަކަށް އެވޯޑްދީފައެވެ. 

އެވޯޑް ޙަފްލާ ޝަރަފްވެރިކޮށްދެއްވީ މިނިސްޓަރ އޮފް ފިނޭންސް އެންޑް ޕްލޭނިން، މޫސާ ޒަމީރުއެވެ. މި ޙަފްލާގައި މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް، މުޙައްމަދު ސަޢީދާއި، ބިޒްނަސް ސެންޓަރ ކޯޕަރޭޝަންގެ މެނޭޖިން ޑިރެކްޓަރ އިބްރާހީމް ޒިޔާޢު މުޙައްމަދުގެ އިތުރުން ސަރުކާރުގެ އެކި ކުންފުނިތަކުގެ އިސްވެރިންނާއި، ބޭރުގެ އެކިއެކި ޤައުމުތަކުން ރާއްޖެއަށް ކަނޑައަޅުއްވާފައި ތިއްބެވި ސަފީރުންވެސް ބައިވެރިވެވަޑައިގެންނެވިއެވެ.

މިއީ ކުދި ވިޔަފާރިތަކަށް ޚާއްޞަކޮށްގެން މިފަދަ އެވޯޑެއް ދިން ފުރަތަމަ ފަހަރެވެ. ބީސީސީން ވަނީ މި އެވޯޑް ކޮންމެ އަހަރަކު ވެސް ދިނުމަށް ނިންމާފައެވެ.