ENGLISH

29 ނޮވެމްބަރު 2025

Advertisement

ރާއްޖެއިން ލަންކާއަށް 50،000 ޑޮލަރާއި 25،000 މަސްދަޅު ހަދިޔާކުރަނީ

29 ނޮވެމްބަރު 2025

|

ޢަލީ ޝަހީމް

ސްރީލަންކާއަށް މިހާރު ކުރަމުންދާ ވިއްސާރައާ ގުޅިގެން، އެ ޤައުމަށް ފައިސާގެ އެހީގެ ގޮތުގައި 50،000 (ފަންސާސް ހާސް) އެމެރިކާ ޑޮލަރު އަދި މަސްދަޅުގެ 25،000 (ފަންސަވީސް ހާސް) ކޭސް  ހަދިޔާ ކުރަން ދިވެހި ސަރުކާރުން ނިންމައިފިއެވެ.

ވިއްސާރައިގެ ސަބަބުން އުނދަގޫ ޙާލަތެއްގައި އޮތް ލަންކާއަށް އެހީވާން ނިންމިކަން ހާމަކުރީ ޚާރިޖީ ވުޒާރާއިން މިއަދު އާއްމުކުރި ބަޔާނެއްގައެވެ.

އެ ވުޒާރާއިން އާއްމުކުރި ބަޔާނުގައި ބުނީ ސަރުކާރުގެ މި ނިންމުމަކީ، 'ދީތުވާ' ތޫފާންގެ ސަބަބުން ލަންކާގެ އެކި ހިސާބުތަކަށް ބޯކޮށް ވާރޭވެހި އެ ޤައުމުގެ ރައްޔިތުންނަށް ލިބިފައިވާ ގެއްލުންތަކާއި ދަތިތަކުން އަރައިގަތުމަށް އެ ޤައުމަށް އެހީތެރިވުމުގެ ގޮތުން ނިންމި ނިންމުމެއް ކަމަށެވެ. 

މި އެހީތެރިކަން ރަމްޒުކޮށްދެނީ ދެ ޤައުމުގެ ދެމެދުގައި އޮތް ގާތް އެކުވެރި ގުޅުމާއި މިފަދަ އުނދަގޫ ދަނޑިވަޅެއްގައި އެ ޤައުމުގެ ރައްޔިތުންނާއެކު ދިވެހި ރައްޔިތުން ތިބިކަން ކަމަށް ބަޔާނުގައި ބުނެފައިވެއެވެ.

މި އެހީގެ ސަބަބުން ޙާލުގައި ޖެހިފައިވާ ލަންކާ ރައްޔިތުންނަށް ކޮންމެވެސް ވަރެއްގެ ތަސައްލީއެއް ލިބި، ލަންކާ ސަރުކާރުން ކުރަމުންދާ މަސައްކަތައް ކޮންމެވެސް ވަރެއްގެ ލުއިކަމެއް ލިބިގެންދާނެކަމަށް ދިވެހި ސަރުކާރުން ބުނެފައިވެއެވެ. 

މިފަދަ ކަންކަމުން ދައްކުވައިދެނީ ދެ ޤައުމުގެ ދެމެދުގައި އާއި ރައްޔިތުންގެ މެދުގައި ހިއްސާކުރާ ގާތް އެކުވެރި ގުޅުން ކަމަށް ޚާރިޖީ ވުޒާރާއިން ވަނީ ބުނެފައެވެ.

ލަންކާގައި ގިނަ އަދަދެއްގެ ދިވެހިން ދިރިއުޅޭއިރު، ދިވެހި އެއްވެސް މީހަކަށް ކާރިސާގެ ސަބަބުން ގެއްލުމެއް ލިބިގެން ރިޕޯޓްކޮށްފައި ނުވާކަމަށް ލަންކާގައި ހުންނަ ރާއްޖޭގެ ހައި ކޮމިޝަނުން ވަނީ ބުނެފައެވެ. 

ހައި ކޮމިޝަނުން ރޭ ނެރުނު ބަޔާނުގައި ވަނީ، ލަންކާގައި ދިރިއުޅޭ ދިވެހިން ސަމާލުވެ، ރައްކާތެރި ކަމުގެ ފިޔަވަޅުތައް އެޅުމަށް އިލްތިމާސްކޮށްފައެވެ. 

މި ފަހުގެ ތާރީޚެއްގައި އަވައްޓެރި ލަންކާއަށް ކުރިމަތިވި އެންމެ ބޮޑު މޫސުމީ ކާރިސާގައި ފެންބޮޑުވުމާއި، ބިންގަނޑު ކަނޑައިގެން ދިއުމުގެ ހާދިސާތައް ވަނީ ހިނގައިފައެވެ. އެ ހާދިސާތަކުގައި މިހާތަނަށް 56 މީހަކު މަރުވެފައިވާއިރު، 21 މީހުން ގެއްލިފައިވާކަމަށް ނޫސްތަކުން ވަނީ ރިޕޯޓްކޮށްފައެވެ. 

ކިޔުންތެރިންގެ ހިޔާލު